O Bloque Nacionalista Galego constituíu este sábado o seu Consello Nacional -máximo órgano de decisión entre asembleas- cunha renovación do 46 por cento dos membros e cos obxectivos de ‘sintonizar’ a súa mensaxe coa sociedade e erixirse na ‘alternativa política’ ao PPdeG.

O secretario xeral do PSdeG, Manuel Vázquez, amósase ‘absolutamente convencido’ da nova estrutura provincial que implantará o partido. Ademais, solicítalle á militancia ‘superar definitivamente’ a fase tras os comicios autonómicos do 1 de marzo e ‘non confundir perder as eleccións con dobrar o xeonllo’.

O voceiro nacional do BNG, Guillerme Vázquez, descarta unha reunión entre nacionalistas e a asociación Galicia Bilingüe (que mantivo un encontro con membros do grupo parlamentario do PSdeG) ao considerar que teñen pouco que intercambiar. O líder nacionalista alerta da 'desgaleguización brutal' que vive o país na actualidade.

Foi Conselleiro da Presidencia con González Laxe e deputado do BNG até o 1 de marzo pasado. O profesor de Dereito Administrativo Paulo González Mariñas (A Coruña, 1944) é un veterano dirixente nacionalista, candidato á presidencia da Xunta por Coalición Galega e fundador do PNG, unha das organizacións integradas no BNG. É fundador do Instituto Galego de Estudos Europeos e Autonómicos, que presidiu varios anos e no que vén de sucedelo Anxo Quintana.

As direccións do PSdeG e BNG analizan hoxe os resultados das recentes eleccións europeas en sendas reunións que terán lugar en Santiago de Compostela e Teo, respectivamente.

Laura Seara –unha das deputadas máis próximas ao líder do PSdeG, Manuel Vázquez– denuncia varias irregularidades no novo Executivo. Entre elas, manter un ‘superdelegado’ que subvencionou unha central de biomasa que non existe. Coñecedora da política ourensá, Seara cre que as críticas de Baltar a Feixóo só buscan asegurar que o seu fillo herda o poder no PP desta provincia.

O PSdeG anunciou que, ante o 'ataque directo á educación pública' perpetrado pola Xunta, presentará desde 'xa' mocións en todos os concellos galegos e nas deputacións provinciais e recollerá firmas nos meses de xullo e agosto en contra da supresión da gratuidade dos libros de texto.

A titular de Facenda, Marta Fernández Currás, e os representantes dos tres grupos parlamentarios reuniranse hoxe na sede da consellaría para abordar o resultado das últimas reunións entre Alberte Núñez Feixóo e os vicepresidentes segundo e terceiro do Goberno sobre o financiamento autonómico. PSdeG e BNG esixen coñecer as cifras concretas coas que está a negociar o presidente da Xunta.

A Dirección Xeral de Tráfico (DXT) prevé, aproximadamente, 7,6 millóns de desprazamentos entre os meses de xullo e agosto nas estradas de Galiza, o que supón o 9 por cento dos 84 millóns de movementos de vehículos como consecuencia das vacacións de verán. A primeira fase do operativo comeza hoxe.

Constructora Hispánica, acusada de pagar comisións á trama Gürtel, foi a favorita dos contratos das Deputacións galegas en 1999. Daquela estas administracións estaban nas mans do PPdeG e o número tres dos conservadores galegos era Pablo Crespo, hoxe en prisión preventiva por ser un dos presuntos cerebros da trama.