Xurado e gañadores do VIII Concurso de Proxecto Empresariais Innovadores Bit Oceans recibirá os nove mil euros e un préstamo especial de 24.000 euros como gañadora do principal premio, nun concurso no que podían participar investigadores galegos de calquera universidade. A empresa gañadora ten a sede no viveiro da Cámara de Comercio de Vigo e traballa no campo da seguridade informática. O seu principal produto é Fividoc, un software que permite localizar alteracións nos documentos empregando tan só impresoras e escáneres.

O galardón foi recollido por Alberto Malvido, da Universidade de Vigo, quen foi o promotor da compañía xunto cos profesores da USC Fernando Pérez e Oscar Márquez.

ADN para o peixe

O segundo premio, cunha dotación de cinco mil euros, foi parar a Xenotech Laboratorios, que traballa no campo da seguridade alimentaria. Nacida da USC, esta empresa traballa co ADN dos alimentos, especialmente do peixe. Xenotech está formada por cinco investigadores de Bioloxía e Químicas.

O terceiro galardón foi para Paralelaxe Multimedia and Virtual System, que recibirá 2.000 euros. A compañía, unha proposta do Laboratorio de Sistemas da USC, céntrase no campo da realidade virtual. Paralelaxe propón “unha web colaborativa que permite ofrecer mellores prazos de desenvolvemento dos proxectos”.

IDM Maquinaria

A categoría empresa moza foi para a firma viguesa IDM Maquinaria, que opera no campo das canteiras e graniteiras. Inbiogal, unha firma da mesma cidade que traballa dende 1990 na detención do cancro, recolleu o premio na modalidade de Muller Emprendedora, pois a maioría dos seus 14 membros son investigadoras dos departamentos de bioquímicas da USC e da Universidade de Vigo.

O Centro de Acústica e Servizos de Telecomunicacións, SONEN, unha consultora no campo das telecomunicacións e a acústica instalada na Tecnópole ourensá gañou a categoría de mellor proxecto mediambiental. Estes tres últimos galardóns aportarán dous mil euros aos emprendedores.

“Sodes os máis arriscados”

No acto de entrega en Compostela, o reitor da USC, Senén Barro díxolles aos premiados que “sodes os máis arriscados, pero non vos preocupedes se fracasades neste primeiro intento, e posíbel que moitos pasedes por isto, pero estou seguro que se non vos conformades coa rutina acabaredes tendo éxito”.