Quintana, na visita aos Irmáns Misioneiros dos Enfermos Pobres de Teis. AGN    1 / 2     Así o confirmou hoxe en Vigo o vicepresidente galego, Anxo Quintana, antes de visitar a sede dos Irmáns Misioneiros dos Enfermos Pobres de Teis, onde confirmou que, "ante a actual situación de crise" e, tendo en conta que, nese contexto "os que máis sofren son a xente humilde", multiplicaranse por dúas estas axudas destinadas a comedores sociais, albergues e outros dispositivos de atención.

Esta decisión canalizarase a través dun primeiro paquete de axudas, aprobado hoxe no Consello, que beneficiarán unha ducia de entidades, entre elas o centro visitado hoxe por Quintana, que recibirá unha achega extraordinaria de 15.916 euros –que se suman aos 136.500 euros que xa recibiu este ano por parte de Vicepresidencia–.

Beneficiarios

A maiores, Cáritas Diocesana de Mondoñedo-Ferrol recibirá un total de 15.916 euros; Cáritas Diocesana de Santiago de Compostela 35.000 euros; Cáritas Diocesana de Lugo 15.918 euros; Santo Hospital de Caridade 14.250 euros; o Instituto Benéfico Social Pai Rubinos 25.820 euros; e a Fundación Amigos de Galicia 14.250 euros.

Estas subvencións complementaranse, segundo apuntou o vicepresidente, cun aumento de case o 80 por cento no orzamento previsto inicialmente para a orde anual de subvención do ano 2009, e que permitirá ás entidades desenvolver o seu labor nun momento como o actual, no que "hai incremento" na demanda dos seus servizos.

Ademais das axudas a entidades, Quintana explicou que a Xunta está comprometida coa implantación dunha rede pública de atención, que inclúe centros como o que se abrirá en Vigo no primeiro trimestre de 2009, no edificio coñecido como 'A pinga de Leite'. A este respecto, insistiu en que o centro abrirase nese inmoble, a pesar da petición do alcalde para que se lle ceda ao Concello.