A gaiteira Susana Seivane, unha das gañadoras Este ano, as persoas e colectivos premiados son do ámbito musical: na modalidade de premio a un persoeiro foi a gaiteira Susana Seivane a gañadora; na categoría de institucións, a Escola de Gaitas de Vilafranca do Bierzo e mais a agrupación berciana Aira da Pedra son as homenaxeadas.

A resolución dos premios xa fora presentada en público o pasado 11 de decembro, no Barco de Valdeorras e en Ponferrada. O xurado estivo composto por sete membros: un escollido por Xarmenta (o presidente dos premios), un escollido polo Consejo Comarcal del Bierzo —gañador dun premio Xármenta en 2005—, un escollido polo Concello da Ponte de Domingo Flórez, un escollido pola Comisión Cultural Martín Sarmiento, un escollido polo Concello de Cacabelos, un escollido pola Área de Normalización Lingüística da Universidade de Vigo e o secretario de Xarmenta (o secretario dos premios). O veredicto do xurado foi acadado por unanimidade na súas dúas modalidades.

Esta cuarta edición é posíbel grazas á Asociación Berciana da Lingua Xármenta e ao apoio que recibiu da Consellaría de Cultura e Deporte da Xunta de Galicia, Secretaría Xeral de Politica Lingüística, Galería Sargadelos, UNED de Ponferrada, Prada a Tope, Hotel AC-Ponferrada, Concello de Ponferrada, Concello da Ponte de Domingo Flórez, Concello de Cacabelos, Comisión Martín Sarmiento, Universidade de Vigo ou o Teatro Municipal Bergidum.

A gala, conducida polos xornalistas Ricardo López Témez —do Bierzo— e Soledad Figueroa —de Valdeorras— e estarán acompañados polas actuacións musicais dos premiados, acompañados por Anxo Rei e mais polo Mago Richard. Entregaranos o director xeral de Creación de Difusión Cultural da Consellería de Cultura e Deporte da Xunta, Luís Bará, a secretaria xeral de Política Lingüística, Marisol López e o alcalde de Ponferrada, Ricardo López Riesco, e na gala repartirase tamén o número 3 da revista Xármenta.