Representantes sindicais do sector do transporte nas oficinas da Xunta en Vigo. AGN

A Plataforma para a Defensa do Sector de Transporte de Mercadorías por Estrada advertiu hoxe de que, a partir do próximo día 6, se vivirá unha folga "apoteósica e terrible", polo que recomendou á poboación que se provea de alimentos e produtos de primeira necesidade.

"Avecíñase unha catástrofe a nivel nacional", insistiu o voceiro galego e nacional da Plataforma, Antonio Llanos, posto que "se vai parar toda España" e informou de que a folga será "indefinida" até ser recibidos polo Goberno. "E que atenda ás nosas reclamacións", apostilou e confiou en que "entenderá a resposta dos transportistas".

As súas reclamacións céntranse en diseñar unha norma que garanta un prezo estable do carburante que sexa revisable e actualizable semestralmente, así como outra que asegure ao transportista o cobramento dos portes e que non teña que realizar traballos de carga e descarga; entre outras.

En canto á parte social, esixen que se recoñezan as enfermidades profesionais, que se poña en coñecemento aos traballadores dos seus dereitos, que se revisen de modo "urxente" as normas de condución e descanso e que se constrúan máis áreas de descanso vixiadas e pechadas.

Ademais, o voceiro da asociación indicou que esta plataforma reúne ao 87 por cento dos traballadores do sector e confirmou que ao paro xeral que vivirá España se sumarán, o próximo mes, Francia, Italia e Alemaña.

Discrepantes

Pola súa banda, o presidente da Federación Empresarial de Transporte de Mercadorías por Estrada de Galicia (Fetram), Belarmino Torrente, avanzou que a súa asociación "non se sumará ao paro" porque non están "de acordo" cos modos de actuación da Plataforma e optou por esgotar as vías de negociación antes de recorrer ao paro.

Na mesma liña, o presidente da Federación Galega de Transporte de Mercadorías (Fegatramer), Alfonso Parga, explicou que Guitrans está a manter reunións en Madrid co Goberno, das que esperan obter melloras que non fagan necesario ir á folga.

Non obstante, admitiu que a Administración "non pode facer nada" en canto ao prezo do combustible, posto que España aplica o mínimo de impostos dentro dos límites fixados pola Unión Europea, polo que asumiu que as protestas terían que ser "a nivel europeo".

Polo tanto, apostou por que o Goberno permita reducir temporalmente a flota "ata que a situación se normalice", así como por aumentar a cantidade asignada para o abandono do sector debido á idade, para que a flota se poida ir reducindo mentres a crise non remite. "Porque o noso sector é o primeiro en notala", lamentou.