Tras deixar Galiza e iniciar unha aventura en Estados Unidos que a levou a ser proclamada unha das mellores xogadoras da Liga Universitaria, a viguesa Tamara Abalde continúa co seu crecemento deportivo ao ser preconvocada pola selección española para disputar o Preolímpico que se celebrará en Madrid e para o que chamaron a 14 baloncestistas.

Así, ás oito xogadoras fixas como Elisa Aguilar, Nuria Martínez, Laia Palau, Isabel Sánchez, Amaya Valdemoro, Anna Montañana, Lucila Pascua e Cindy Lima; súmanse seis novos talentos -Silvia Domínguez, Anna Cruz, Alba Torrens, María Revolto, Tamara Abalde e Laura Nicholls- que completarán a lista que buscará a clasificación para a cita olímpica, da que quedaran fóra dúas das promesas. Todo indica que Abalde será unha das elixidas na convocatoria final.

O día 9 de xuño España debutará no Preolímpico ante Fiji. O día 11 completarase a Primeira Fase co importante choque ante Brasil. Os dous primeiros clasificados de cada grupo disputarán os cuartos de final o día 13, que terán como premio para os gañadores o pase directo aos Xogos Olímpicos de Beixing. Os perdedores do cruzamento de cuartos pelexarán pola quinta praza que tamén dá o pasaporte a Pequín.

A seleción estatal buscará a súa terceira clasificación para uns Xogos Olímpicos. En 1992 a selección feminina participou pola súa condición de anfitrión mentres que en Atenas 2004 conseguiuse grazas ao bronce do Europeo de Grecia 2003.

A chamada para o Preolímpico impedirá que Abalde lidere á selección galega no Torneo das Nacións que se xogará 0 16 e 17 de maio en Santiago e no que estarán, ademais de Galiza, Euskadi, Catalunya e Portugal.