O presidente da Xunta, Alberte Núñez Feixóo, en rolda de prensa. AGN

O Goberno galego aprobou este xoves o anteproxecto de lei que reduce nun 50 por cento os tributos autonómicos -imposto sobre transmisións patrimoniais e actos xurídicos documentados- para os menores de 36 anos e as familias numerosas que merquen unha vivenda a partir do 1 de xullo de 2009.

Segundo o presidente da Xunta, Alberte Núñez Feixóo, máis de 600.000 galegos poderán beneficiarse desta medida que non fai ningún tipo de distinción de renda pero estabelece límites patrimoniais. A norma, que debe tramitar o Parlamento, podería aprobarse no mes de outubro, pero incluirá unha disposición transitoria que estenderá os beneficios fiscais ás vivendas compradas desde o día 1 deste mes.

Na rolda de prensa posterior ao Consello da Xunta, Núñez Feijóo reiterou que a aplicación desta rebaixa será "provisional" para os mozos que, en principio, só poderán beneficiarse da mesma até o ano 2011, aínda que a aplicación da medida podería "prorrogarse" se persiste a crise. A rebaixa será "permanente" no caso das familias numerosas.

Segundo explicou o máximo mandatario galego, no caso das transmisións patrimoniais, o tipo de gravame aplicábel ás transmisións de inmóbeis que vaian converterse en vivenda habitual do contribuínte será do 4 por cento fronte ao 7 por cento actual.

Por outra banda, no imposto sobre actos xurídicos documentados, na súa modalidade de documentos notariais, o tipo de gravame para as primeiras copias de escrituras que documenten unha adquisición de vivenda habitual baixará do 1 ó 0,75 por cento ao 0,3.

Impacto económico “asumíbel”

A Consellaría de Facenda estima que esta rebaixa fiscal terá un impacto económico anual de 7 millóns de euros nas arcas públicas. Neste sentido, Feixóo mostrouse convencido de que este custo é "asumíbel" e apuntou tamén que se verá "rebaixado" grazas á "reactivación" do mercado inmobiliario en Galiza, unha das comunidades "que máis gravaba" pola adquisición dunha vivenda.

Para rematar, Feixóo subliñou que a aplicación desta rebaixa fiscal permitirá aos colectivos beneficiados "un aforro de 7.000 euros" na adquisición dunha vivenda de 180.000 e resolveu que constitúe "un exemplo de autogoberno responsábel".