Rolda de prensa da CIG na que os inmigrantes denunciaron escravismo en Eshor. CIG

Por segunda vez produciuse unha concentración ante a CIG de traballadores desta compañía con sede en Fene (A Coruña) -a anterior foi o pasado xoves- na que están empregadas unhas cincocentas persoas, e que dá emprego a un grande número de traballadores inmigrantes, na súa maioría procedentes de países como Perú, Ecuador ou Marrocos.

A concentración estivo vixiada pola Policía Nacional e produciuse fronte á presenza de máis de cincuenta representantes da CIG. Nas súas pancartas, os obreiros de Eshor plasmaron frases como "sindicato CIG: non nos defendas", e palabras críticas a Xesús Anxo López Pintos, secretario comarcal, ao que se cualificaba de "mentireiro".

Para esta concentración, desprazáronse dende Madrid numerosos traballadores nun autobús e en varias furgonetas, que os voceiros do grupo aseguraron que foran pagados do seu propio peto "entre todos", aínda que algún dos operarios presentes afirmou con anterioridade que quen pagara o traslado foi a propia compañía.

Os voceiros dos manifestantes explicaron que temen que as críticas da CIG afecten á imaxe exterior da empresa e, en consecuencia, se produzan perdas de contratos e de empregos.

Un dos voceiros e encargado da empresa en Madrid, Fernando Pena, asegurou que as declaracións de López Pintos son "calumnias aos traballadores, que son os que dan as nóminas a asinar" e aos que se está a acusar de "racistas". "Notamos consecuencias porque as empresas para as que traballamos na zona de Madrid, preguntan por isto", explicou.

A CIG acusou a semana pasada á compañía de obrigar os inmigrantes a asinar unha baixa laboral sen data que se faría efectiva no momento no que sufrirían un accidente, de modo que perderían o seu emprego e os dereitos laborais adquiridos. As acusacións de "explotación laboral" foron trasladadas aos Xulgados, a través das denuncias presentadas por varios traballadores inmigrantes, avalados polo sindicato.

Coaccións para protestar

Ao termo da concentración, un traballador de orixe peruana, que presentou denuncia ante o Xulgado do Penal contra a compañía por incumprimento de contrato, asegurou que moitos dos seus compañeiros inmigrantes acudiran á protesta "condicionados" pola empresa e alentados polos seus propios compañeiros e xefes.

Despois de case un ano de traballo, vivindo con 8 compañeiros nun piso de "90 metros cadrados", de recibir "ameazas" de agresións por parte de un responsable da compañía, este operario afirmou que "é inaudito o que está a pasar", que "teme" pola súa vida, e que a compañía ameaza os inmigrantes con non lles renovar o seu contrato de traballo e non lles devolver o seu "boleto" -billete de avión de regreso- do que se"apropiarían" responsables de Eshor no momento da súa chegada a España.

Este traballador subliñou, ante os medios de comunicación, que en ningún momento se cumpriu o acordo laboral que asinara no seu país, xa que realizou o dobre de horas de traballo das previstas, sen gozar vacacións e traballando en fins de semana.

Versión da CIG

Pola súa banda, o responsable da CIG, Xesús Anxo López Pintos, ratificouse nas súas declaracións anteriores e, tras a protesta, engadiu que "a empresa está a utilizar a precariedade dos traballadores estranxeiros para utilizala contra un sindicato".

Recalcou que o sindicato xa recibiu as reclamacións de máis de 40 persoas, algunhas delas trasladadas á vía xudicial, nas que se constataría que Eshor incumpre, "nun grao de mafioso", os convenios de contratación de inmigrantes establecidos co Ministerio de Traballo.

O obxectivo da CIG será agora tratar de que se inicie unha investigación sobre o funcionamento de compañía construtora, despois da presentación de varias denuncias por "vía penal".