Cabezas de vacún da cooperativa luguesa COGACE. Xatogal Trátase das xornadas “Comercio Electrónico e Novas Tecnoloxías no Medio Rural” que está a por en marcha a Axencia Galega de Desenvolvemento Rural AGADER. Terán lugar os días 28 e 29 deste mes na Estrada para mostrar como a rede serve para mellorar a calidade de vida no agro.

Comercios con ética

Nelas participará Xavier Villanueva, representante de Xatogal, unha cooperativa luguesa que permite a compra de carne de vacún de produción ecolóxica a través de internet. O “respecto ao medio, ao benestar dos animais e á fertilidade do chan”son algúns dos principios éticos que rexe este innovador negocio.

Manuel Fuentes será o voceiro de Todopatatas.com, unha portal que dende hai uns meses comercializa patacas de Coristanco. Ao igual que Xatogal, esta e-tenda presume da calidade natural dos seus produtos, pois os seus tubérculos medran “sen necesitade de regar e cun crecemento continuo”.

Internet contra o 'boom' dos prezos

Outras das vantaxes deste tipo de negocio son os prezos. O aumento da demanda dos produtos ecolóxicos –no país a pareceron nos últimos anos cooperativas de consumo responsábel en Vigo, Santiago e Ferrol– está a disparar o seu custe nas tendas tradicionais.

Porén, internet facilita un contacto directo cos produtores. En palabras dos agricultores de Coristanco: “os nosos prezos sempre serán moi competitivos, xa que as patacas envíanse directamente da zona de produción a casa do consumidor, evitando as grandes canles de distribución, onde queda unha boa parte do prezo”.

Grelos e viño

José Posada de Marrón Glacé –firma de San Cibrao das Viñas que vende no ciberespazo castañas, grelos e derivados destes alimentos–, Iván Gómez de Regina Viarum –adega sitúada en Sober, en pleno corazón da Ribeira Sacra, especializada en viños Amandi– e Marta Rey –en representación do Mercado de Abastos de Santiago de Compostela– serán outros dos profesionais que explicarán as claves de como vender produtos galegos do agro a través do ciberespazo.

Código aberto

O software libre aplicada ás explotacións lácteas e a banda larga no rural serán outros dos puntos a debater. No encontro está previsto a presencia do Conselleiro de Medio Rural, do alcalde da Estrada e da directora xeral de Promoción Industrial e Sociedade da Información, entre outros persoeiros.