Cartel do XII Salón do Cómic de Cangas. Kenny Ruido Un encontro con Tirso Cons na tarde do día 25 de xullo será un dos puntos álxidos desta cita anual coa banda deseñada no Morrazo. O pontevedrés, afincado en Madrid, ten álbums publicados no mercado francés. Ao día seguinte, o público poderá estabelecer conversa con Manel Fontdevila e Al Barrionuevo.

Fontdevila destaca pola súa serie na revista El Jueves 'La Parejita', amais da sección que comparte con Monteys, 'Para ti, que eres joven'. Chegou a dirixir a publicación entre o 2000 e o 2004, e con Monteys creou, tamén, a portada da polémica, en que Felipe de Borbón e Letizia Ortiz aparecían mantendo relacións sexuais, e que lle supuxo unha multa e o secuestro da revista. Al Barrionuevo, pola súa banda, é arxentino, pero leva tempo afincado en Compostela, e son salientábeis os seus superheroes.

Estarán tamén presentes o arxentino Horacio Altuna, unha celebridade no mundo do cómic erótico, ou Kenny Ruido, autor do cartel desta edición, para o que se inspirou no monte do Facho. Amais, o martes 22 pola mañá comezarán os obradoiros de banda deseñada con Jvlivs e Luís Davila.

O mércores 23, á tardiña, entregaranse os premios do décimo Certame de Cómic e presentarase a revista O Tebeo, editada pola Concellaría de Xuventude do Concello de Cangas, onde se recollen as propostas gañadoras. Un xurado profesional ha escollelas nos próximos días entre as 72 que foron presentadas. Tamén se presentará, o xoves 24 de xullo, unha escolma do mellor de Luís Davila, Jalisia Kaníbal.

A mostra 10 anos de BD galega, coordinada pola Asociación Galega de Profesionais da Ilustración (AGPI), e distribuída pola Consellaría de Cultura e Deporte, e pequenas exposicións, nos bares da vila, dos orixinais asinados da colección de ilustracións que se foi recompilando no Salón, son outras das actividades.