Cámara de videovixilancia. Flickr: Quam 07

O Movemento polos Dereitos Civís (MpDC) alerta que “o Concello de Ourense recoñece o uso ilegal de cámaras de tráfico para tarefas de videovixiancia”. A asociación tamén denuncia situacións semellantes nos concellos de Lugo e O Grove.

Na cidade das Burgas, o MpDC alerta que o municipio “carece da autorización da Delegación do Goberno para ter operativos dispositivos de control cidadán”. Con todo, o concello recoñeceu nun escrito que as cámaras “cumpren un dobre obxectivo: o principal é a protección da seguridade cidadá e o secundario (que ven definido na disposición adicional 8ª) é a vixilancia do tráfico”.

Informe de Madrid

O MpDC lembra que, segundo informou o Goberno Estatal no Parlamento, só dous municipios do país -Santiago e A Coruña- teñen permiso para usar cámaras con fins de videovixilancia.

No caso de Lugo, o Movemento adianta que o Valedor do Pobo vai investigar a instalación cámaras de videovixiancia no Polígono do Ceao. O Concello está a tramitar o permiso para esas cámaras, que a organización cidadá non considera adecuada. O Movemento aposta porque a Policía controle o tráfico sen ter que usar aparellos de vixilancia.

Gran irmán na Festa do Marisco

Por último, no Grobe, oValedor do Pobo iniciou esta semana a investigación sobre a “utilización indebida” por parte do concello na Festa do Marisco.

“Durante o pasado mes de setembro, o Concello instalou catro dispositivos de vixilancia nas carpas nas que se desenvolvía a festa para controlar os posibles furtos, segundo o edil de Seguridade Cidadá, Alfredo Bea. Non obstante, a entidade carecía dos permisos necesarios estabelecidos pola Lei”, di o Movemento.

O que di a Lei

A instrución 1/2006 da Axencia de Protección de Datos é a Lei que regula estes dispositivos. Entre outros requisitos, obriga ás autoridades a avisar da presenza das cámaras, tanto se gravan como se non, e usalas só cando non existen outros medios de control.

O Movemento tamén denunciou a existencia da cámaras sen sinalar ao redor do Parlamento de Galicia, en Santiago.