Santiago acolleu hoxe o 'Foro Cambio Demográfico', no que tamén se presentou un estudio da Escola Galega de Administracións Públicas (EGAP). No citado informe constátase que Galicia é unha das rexións europeas cunha menor taxa de natalidade.

Neste contexto, Carme Adán explicou que o Plan de Apoio ás Familias Galegas centrarase en "atender ás novas realidades sociais derivadas do cambio demográfico" e "apoiar as parellas para que poidan ter o número de fillos que desexen".

Catro liñas de actuación

Tamén tratará de poñer en valor os diferentes modelos de familia, programar políticas preventivas destinadas ás situacións familiares máis vulnerables e facilitar a conciliación das responsabilidades familiares, persoais e laborais.

Con este obxectivo, a Secretaría Xeral de Igualdade disporá dun presuposto de 600.000 euros para os próximos catro anos, nos que levará a cabo distintas accións nas áreas de 'Natalidade e convivencia nos fogares', 'Fomento da conciliación', 'Educación', 'Infancia e adolescencia', 'Maiores e persoas con minusvalidez' e 'Rural'.

Así, se desenvolverán actuacións de acompañamento en rupturas familiares; de educación na corresponsabilidade das tarefas domésticas; de implicación familiar nunha educación "responsable" que promova a igualdade e a solidariedade; de coidado das persoas maiores e os minusválidos; e de sensibilización das mulleres do medio rural para que valoren o seu tempo de ocio e dos homes para que colaboren no coidado do fogar, entre outras.

Portal en liña

Na mesma liña, durante a próxima semana porase en funcionamento a páxina web 'www.familiasgalegas.org', na que se poderá acceder a diferentes prestacións, tales como renovar o carné de familia numerosa e consultar as diferentes axudas e subvencións concedidas a cada tipo de familia.

A responsable de Igualdade explicou que a páxina tamén contará cun apartado "específico" para técnicos de Educación Familiar que funcionará como un foro no que poderán compartir documentación e intercambiar noticias de interese, entre outras accións.

Ao respecto, confiou en que será "unha ferramenta de comunicación moi útil" para os máis de 200 profesionais do sector que se atopan en Galicia, aos que facilitará un contacto "moi fluído"; e tamén fixo fincapé en que resulte "de interese" para as familias que queiran ter coñecemento dos recursos e programas dispoñibles.