Con esta medida, os cidadáns comunitarios que viaxen a outros países da UE pagarán un máximo de 11 céntimos de euro por SMS, fronte á media comunitaria actual de 29 céntimos. No caso de España, o prezo medio é aínda máis elevado, de 40 céntimos, segundo os datos de Bruxelas. Ademais Facua denunciou que agora será un 36,4 por cento máis caro enviar unha mensaxe dentro de España que desde o estranxeiro.

O novo regulamento comunitario impón tamén un tope ás tarifas das maioristas (as que se cargan entre si os operadores) pola transmisión de datos e o uso de de Internet en itinerancia, que irá diminuíndo durante os próximos tres anos. A partir do 1 de xullo, este marzo máximo será 1 euro por mega, tarifa que baixará a 80 céntimos por mega o 1 de xullo de 2010, e a 50 céntimos por mega un ano máis tarde.

Pero ademais, a norma obriga os operadores a avisar a partir do 1 de xullo de 2010 aos consumidores cando o seu consumo supere os 50 euros.

O obxectivo desta medida é evitar sorpresas nas facturas. As compañías terán que informar os seus clientes cando se chegue ao 80 por cento deste limiar.

Unha vez que se alcance o límite, mandarase un segundo aviso aos usuarios indicando o procedemento que deben seguir se desexan continuar descargándose datos en itinerancia. Se o cliente non responde, o servizo interromperase. Os usuarios terán a posibilidade de fixar un límite distinto aos 50 euros.

A norma prorroga ademais tres anos os topes que xa se aplican ao prezo das chamadas de voz no estranxeiro, que en principio terían que expirar en 2010.

Os límites baixarán 4 céntimos cada ano, de maneira que en xullo de 2012 a tarifa máxima para as chamadas realizadas en itinerancia caerá ata 35 céntimos por minuto e para as recibidas ata 11 céntimos (fronte a 46 céntimos e 20 céntimos na actualidade, respectivamente).

Ademais, a UE obrigará ás compañías telefónicas a facturar por segundos e non por minutos todas as chamadas itinerarias, tanto as realizadas como as recibidas, a partir do segundo 31, algo que xa se fai en España. Hoxe en día, os usuarios pagan un 24 por cento máis dos minutos utilizados ao facer chamadas e un 19 por cento máis no caso das chamadas recibidas.

Durante a votación deste regulamento, España abstívose por considerar que podería provocar aumentos de prezos noutros servizos de telefonía.