Non é moi habitual que, por razóns deportivas, o nome de Galiza apareza nas portadas dos diarios vascos. Moito máis complicado resulta que o nome do país sexa visíbel no momento en que o seu portador está sendo aplaudido polo presidente dun país de máis de 70 millóns de habitantes, case o duplo do Estado español. Pero estas cousas pasan, malia que non atopan na casa todo o eco que provocan fóra. Ocorreron da man do Karpin Galicia, que vén de pechar un primeiro terzo de tempada espectacular que incluíu podio en Malaisia, triunfo de etapa no País Vasco e vitoria absoluta na Volta a Turquía, onde o presidente Abdullah Güll lle entregou o trofeo a David García, un de Marín.

Güll foi dúas veces elixido nas urnas turcas o ano pasado, tras unha polémica entre o exercito e os islamitas moderados que provocou ruído de sabres nos cuarteis e ocupou amplos e preocupados espazos na prensa mundial de referencia. Ese mesmo home cuxas ambicións continentais provocan amargas discusións entre os Estados membros da UE e que hai tres meses era recibido por George Bush na Casa Branca foi fotografado hai poucos días mentres sorría e lle aplaudía a un rapaz cun maillot amarelo no que se lía claramente o nome do seu equipo: Karpin Galicia. A forza simbólica da imaxe, non obstante, apenas tivo eco na terra do que era homenaxeado polo internacional dirixente.

“O ciclismo é un deporte que nos mostra ao mundo”, dixo o presidente da República Turca, con David García ao seu carón. Cumpre con esa motivación expansiva o equipo profesional galego polo panorama estatal e internacional, pero cústalle atopar espazo na casa. “No País Vasco dedícannos páxinas enteiras e en Galiza menos, non me cabe na cabeza”, dicía o mecenas do equipo, Valeri Karpin, durante unha etapa da Volta a Euskadi. Alí tamén brillou o conxunto galego, na que era a súa estrea nunha competición de equipos ProTour, a elite do ciclismo mundial. O equipo de Álvaro Pino non ten esa condición, pero foi o principal animador da proba, que convoca milleiros de persoas nas estradas vascas. David Herrero, tras dous terceiros postos consecutivos, acabou por gañar unha etapa, ante a admiración xeral dos medios locais, que lle adicaron lugares de honra nas súas portadas. Tamén destacou Ezequiel Mosquera, que rematou entre os dez primeiros nesa prestixiosa rolda, que gañou o vixente campión do Tour, Alberto Contador.

Os éxitos do Karpin non se limitaron ao País Vasco e Turquía. No Tour de Langkawi (Malaisia), Veloso entrou no podio como terceiro e no Criterium Internacional de Francia –a proba por etapas máis importante en solo galo despois do Tour– os galegos foron quintos por equipos. Resultados así converten o conxunto profesional galego nun firme candidato a formar parte do ProTour en 2009, e así participar no Giro ou na rolda gala. Na Volta a España deste ano volverán estar presentes, sendo un dos só tres equipos sen esa condición que tomarán a saída.