Manuel Vázquez, en rolda de prensa. AGN En rolda de prensa en Santiago, o líder socialista defendeu a necesidade de coñecer o "posicionamento" do Goberno galego para as reunións que manterá mañá co vicepresidente terceiro, Manuel Chaves, e coa vicepresidenta económica, Helena Salgado, o vindeiro mércores.

Por iso, co obxectivo de "abordar" este extremo e de "definir a proposta concreta" do seu partido, fixou o 10 de xullo como data para a Deputación Permanente, co obxectivo de que o día 15 estea resolta a cuestión. Ademais, confiou en que o PP non bloquee a convocatoria da deputación, posto que, ao seu xuízo, "sería decepcionante".

Deste xeito, o PSdeG súmase á proposta do BNG de manter o mes de xullo como mes hábil na Cámara galega, debido á necesidade de que o Parlamento "estea reunido" ante os procesos de negociación que se están levando a cabo entre o Executivo galego e o estatal.

Pola súa banda, os socialistas insistiron en que Galiza debe aspirar, "como mínimo", a recibir o 7,1 por cento dos fondos estatais, para manter a cantidade que recibe na actualidade. Ademais, mostráronse contrarios a que a repartición se faga en función da poboación, posto que as comunidades nas que esta aumenta "distanciaríanse cada vez máis". "Ten que quedar claro un modelo de suficiencia dinámica", sentenciou Vázquez.

Apoio a Feixóo

"Apoiamos a Feixóo para que defenda con forza a proposta galega, pero non de modo incondicional. Queremos saber que vai defender na nosa representación", incidiu, á vez que censurou que "a proposta segue sendo descoñecida" e "non é xusto". Contrapuxo esta situación coa "doutras comunidades" que, segundo apuntou, "xa teñen definido o que cren que lles toca". "Conseguirase ou non, pero hai que expolo", sostivo.

En todo caso, Manuel Vázquez mantivo a "política de apoio claro a Galiza" e a "vontade de apoio claro a Feixóo" por parte do PSdeG, aínda que reiterou a censura ao seu "ocultismo". "É un erro, porque debe levar o apoio parlamentario de todas as forzas e empéñase en rompelo", reprobou.

Neste punto, entendeu que "se non mostra vontade, será que prefire negociar só que co apoio dos grupos", que xa lograron un consenso para reclamar maior peso á dispersión e o envellecemento poboacional, a orografía e o custo dunha lingua propia. "Terá que dicir que quere defender", concluíu o dirixente socialista.