Ricardo Varela, conselleiro de Traballo. AGN "Nós falamos de realidades, non de plans virtuais", asegura o secretario de Organización dos socialistas galegos, Ricardo Varela, que considerou "unha vergoña" que o PP "trate de resucitar unha e outra vez o Plan Galicia aprobado hai xa cinco anos".

Por iso, considerou que o PPdeG "ten que facer un exercicio de sinceridade, porque quen tratou con desprezo a Galiza foron os gobernos populares". "O PP improvisou o Plan Galicia. Non foi froito da planificación, senón da improvisación deseñada logo da catástrofe do Prestige", recordou, á vez que engadiu "foi unha ocorrencia para ocultar o fracaso da acción daquel goberno".

Críticas a Cascos

Así, para Ricardo Varela o PP "está deslexitimado" para falar de Fomento "porque no seu día premiou coa Medalla de Ouro de Galicia ao antecesor de Magdalena Álvarez, por Francisco Álvarez Cascos, un dos artífices da xestión da catástrofe do Prestige". "É grave que agora non recorden nin valoren o que fixo a deixou de facer Álvarez Cascos en Galiza e en España", agregou.

Con todo, Varela subliñou que desde o cambio de goberno "Galiza recibe o dobre que cos Gobernos de Aznar". "O Plan Galicia do PP chamábase catro por cento do orzamento xeral do Estado. Era un timo para o país", asegurou e lamentou que "de novo Feixóo trate de proxectar unha visión sectaria, esquecendo con impudor a herdanza que deixaron, tanto cando estaban no Executivo central como na Xunta".

Así mesmo, incidiu en que os gobernos do PSOE "están completando as obras que o PP non fixo en Galiza", precisando que durante os oito anos de goberno do PP en Madrid "non se executou nin un só metro da autovía do Cantábrico en Galiza" e "en cambio o Executivo de Zapatero investiu case 400 millóns de euros".