Touriño e Quintana no Consello da Xunta O mandatario fixo hoxe unha “unha condena sen paliativos” dos incidentes ocorridos tras a manifestación organizada por Unións Agrarias en Lugo. En todo caso, Touriño apuntou que os incidentes “probabelmente non son imputábeis ás organizacións convocantes”.

O papel de Unións Agrarias

Sobre as supostas motivacións de Unións Agrarias, sindicato vinculado aos socialistas, de mobilizar o sector contra a Consellaría de Medio Rural, nas mans do BNG, Touriño dixo que o conselleiro Alfredo Súarez Canal non lle transmitira tal queixa.

Cómpre lembrar que o delegado de Medio Rural, Emilio López, declarou, en referencias a protesta de Unións Agrarias, que “cada vez que se pretende tomar medidas para acadar estabilidade para o sector, forzas estatais tentan impedir que os sectores produtivos galegos se dimensionen para competir”. Touriño considera, polo contrario, que “entrar en análises políticos neste tema é máis mediático que real”.

O líder dos socialistas galegos defendeu a labor de Medio Rural, de quen dixo que está a mediar “con toda a intensidade posíbel”. Ademais na rolda de prensa posterior ao Consello de Goberno aclarou que a Xunta aposta por uns acordos de prezos estábeis do leite que lle mercan as industrias aos gandeiros, que é precisamente unha das reivindicacións da mobilización.

Unidade sindical polo de agora

A protestas do sector leiteiro están a ser protagonizadas polo Sindicato Labrego Galego, de ideoloxía nacionalista, Unións Agrarias e Xóvenes Agricultores, próximos ao PP. Todas as protestas foron unitarias, menos a última realizada fronte a Leite Río en Lugo. En todo caso a unidade de acción sindical mantense nunha nova manifestación en Santiago a próxima semana.

Motivos das protestas

As tres organizacións falan dunha “baixada unilateral” de até 6 céntimos por litro por parte das industrias. Trátase dunha caída dun 13%, pois o prezo medio actual rolda os 0,45 por litro.

Máis de 60.000 explotacións gandeiras desapareceron no país dende 1993. Na actualidade unicamente sobreviven 14.000 granxas leiteiras.