Redacción . Na terceira edición da Mostra Internacional de Videocreación do Condado (Mívico) resultaron premiados Álvaro León, Xavier Daura e Esteban Navarro e Jairo Boisier.
Xavier Daura e Esteban Navarro.
A Nena que tiña unha soa orella do director venezolano Álvaro León e que conta na produción co galego Rubén Coca, resultou a gañadora no apartado de videocreación. A obra, realizada con distintas técnicas de animación, é unha adaptación do conto La fantástica niña pequeña y la cigüeña pedigueña de Lucía Etxebarría.
O premio ao mellor documental recaeu na obra Llamadme Claudia dos directores Xavier Daura e Esteban Navarro. Estes dous directores barceloneses forman o grupo cómico Venga Monjas. O “humor absurdo” deste grupo reflíctese neste falso documentario onde se nos presenta a vida de Claudia.
Finalmente, Vestido do director chileno Jairo Boisier resultou o gañador no apartado da curtametraxe. Vestido é unha historia de corte minimalista e narrada dende unha visión moi intimista. Como contou o seu director nun vídeo enviado dende Chile “o vídeo narra a historia de dúas persoas moi diferentes que teñen un encontro bastante improbábel”.
“Un éxito”
Esta terceira edición foi valorada dende a organización do Mívico como “un éxito en canto a participación e desenrolo do festival”. Exemplo disto foi o interese demostrado polos directores que participaron na programación do Mivico09, presentes nas tres xornadas do festival, compartindo espazos e experiencia co público e con outros artistas.
Segundo a organización, o aumento de público percibiuse nas actividades paralelas realizadas na noite do venres e sábado e no mediodía do sábado, onde o os espectadores puideron gozar de diferentes propostas musicais.
Descargar Tarifas