Coa intención de conservar o posto de Intertoto e non perder de vista as complicadas opcións de UEFA, o Deportivo enfróntase este mércores ao Levante (Riazor 20.00 PPV) nun encontro ante un conxunto descendido hai dúas xornadas (e condenado hai moitas máis) que, non obstante, mantén a dignidade en todas as súas actuacións, se ben todo o que non fose un triunfo local converteríase nunha enorme sorpresa.

Co equipo canso tras o traballo de contención de Zaragoza e a só dúas semanas do remate da Liga, os de Lotina manteñen a ilusión continental pero tamén empezan a notar os primeiros síntomas claros do esforzo da tempada. O adestrador decidiu dar descanso a Xisco -que si xogará contra o Atlético o domingo- e devolverá á titularidade a Bodipo, que afrontará a última proba para convencer á bancada. O resto do equipo será o habitual, coa dúbida de Lopo, que está na lista pero tamén podería ser reservado, deixándolle paso ao galego Adrián López. Coloccini superou as súas molestias e estará presente na busca da marca histórica de disputar todos os minutos da Liga

A gran novidade do Dépor estará no banquiño xa que Valerón regresa a unha convocatoria despois da rotura fibrilar que sufriu en Negreira. Tamén é posíbel que Guardado poda entrar na lista para o Calderón. A recta final da remontada branquiazul esixe a todos. E culminala co éxito de Europa pasa por vencer ao Levante no que sería o sexto triunfo consecutivo en Riazor. Pero antes hai que xogar.