Aranzubía, gardameta do Deportivo da Coruña

O Deportivo saltou ao Ono Estadi con demasiado respecto cara ao Mallorca. Mostra diso foi a posición do brasileiro Filipe Luís, que actuou pola banda esquerda, e non arriba como en partidos anteriores.

No primeiro tempo, o mellor home do conxunto coruñés foi con diferenza o porteiro, Dani Aranzubía, que salvou o equipo cando menos en cinco ocasións creadas por un Mallorca que soubo manexar o esférico. Malia que os baleares crearon moi bo xogo, non tiveron pegada. Julio Álvarez no minuto 10 estrelou un balón no pau, Borja Valero, no 18 e no 42, Mario Suárez, no minuto 28 e Aduriz no 38 topáronse cun Aranzubía soberbio.

Namentres, os homes de Lotina non souberon xogar co esférico. Así, a única ocasión clara na primeira parte creouna Adrián López cara ao minuto 20, pero o futbolista cruzou o disparo en exceso.

Os goles, no segundo tempo

O Mallorca marcou na primeira xogada do segundo tempo, aproveitando unha indecisión da defensa branquiazul. O Deportivo non encaixaba un gol desde había tres xornadas, e Mario Suárez rompeu a racha. Os coruñeses lanzáronse entón en busca do empate, pero catro minutos despois, era castigado, de novo, cun gran gol do uruguaio Gonzalo "Chori" Castro.

Lotina moveu ficha e reforzou o seu ataque con Bodipo e Iván Pérez, que substituíron a Laure e Juca. Porén, atopouse cun rival moi ben armado atrás. O Mallorca manexou moi ben os últimos minutos e a súa portería non pasou por ningún perigo, con excepción dun cabezazo desviado de Bodipo no minuto 87.

Con esta vitoria, o Mallorca selou a mellor primeira volta da súa historia, con nove triunfos consecutivos no Ono Estadi, que lle permiten recuperar un posto na Liga de Campións, precisamente, a costa do conxunto deportivista.