Roberto Trashorras celebra o gol fronte ao Atlético de Madrid. Juan Medina/REUTERS

O adestrador do Celta, Eusebio Sacristán, foi fiel ao seu estilo e aos seus principios no Vicente Calderón. Xogaron habituais suplentes, caso do arbense Ioel, Vila ou Vasco Fernandes e a consigna foi desde o principio atacar, atacar e atacar.

Nos primeiros minutos, os galegos roubáronlle sempre o balón ao medio campo atlético, dirixido por un Tiago que debutaba como titular e Raúl García, moi opaco. Froito desa sorpresa, os vigueses entraron rapidamente na área. Nunha delas, Michu é claramente empurrado, sen que o árbitro Undiano Mallenco pitase o claro penalti. No minuto 4, Iago Aspas inventa unha xogada de cinema e Roberto Trashorras marca o primeiro gol. O de Rábade lanzouse a celebrar o tanto cos afeccionados celestes que se achegaran a Madrid.

Coa vantaxe no marcador, o Celta sufriu máis. O Atlético buscaba a Agüero e Simao, principais referencias en ataque dos atléticos pero Túñez sempre era máis rápido que os atacantes locais.

O gol do Atlético chegou nun córner. Tiago salta máis ca Lago, o vigués esaxera o contacto co portugués e dálle vía libre para que anote dun bonito disparo.

A pesar de que os atléticos poderían verse encirrados a darlle o tiro de graza aos vigueses, foilles imposíbel. Co 1-1 viviuse o mellor fútbol. Os dous equipos atacaban con claridade pero era o Celta o que protagonizaba máis boas oportunidades. Cada vez que o Celta atacaba facíao con tres ou catro homes. Dani Abalo, Iago Aspas e Trashorras estaban unha e outra vez complicándolles a vida a Domínguez e Perea.

Tras o descanso, o dominio celeste afianzouse até converterse o partido nun monólogo celeste. Nos primeiros minutos, os galegos dispuxeron de sobradas oportunidades para marcar o segundo gol. Trashorras de falta e Iago Aspas en dúas ocasións puxeron a proba a De Gea, o segundo porteiro atlético que acabou sendo un dos heroes da noite. As súas manoplas salvaron os branquivermellos de saír derrotados do seu campo.

Eusebio Sacristán pensou que o empate era un excelente resultado pensando na volta en Balaídos e reservou un pouco. Entraron dous mediocampistas de contención, Bustos e López Garai, e o xogo relaxouse un pouco. Aínda así, o Atlético non tivo ocasións até os últimos cinco minutos. Aínda así, o porteiro Ioel só tivo que intervir en momentos puntuais e sen ningún apuro.

O público do Calderón despediu os seus con apupos, sorprendido, seguramente, de que o Celta estea en segunda.