Mar Pereira, secretaria xeral de Modernización Tecnolóxica da Xunta

A secretaria de Modernización explicou a situación de “incoherencia e descoordinación” que di se atopou o Goberno á súa chegada á Xunta, “con dúas redes totalmente independentes e autónomas que tiñan os mesmos obxectivos e estaban financiadas pola Xunta: a de telecentros, 56 aulas que dependían de Presidencia, e os da Rede de Dinamización, 60, da Consellaría de Innovación e Industria”.

“Había unha completa carencia dunha planificación coherente e dunha racionalidade nas actuacións despregadas; a lóxica consecuencia desta situación foi unha multiplicación das duplicidades e unha irracionalidade no gasto”, argumenta Mar Pereira, quen puxo como exemplo desta situación a duplicación de investimentos en nove concellos, nos que había, nos mesmos municipios, dúas aulas, unha de cada rede.

Características da nova Rede

A secretaria xeral explicou que o novo modelo de Rede única do Goberno galego reestruturará de forma eficiente e racional a totalidade dos recursos dispoñíbeis. Neste sentido, Mar Pereira asegurou que, para o seu deseño, foi necesario realizar un estudo en profundidade da situación de cada un dos centros e das duplicidades existentes, e analizar a demanda en cada localización.

“A nova Rede estará xestionada de forma unificada e integrada, coa participación de todas as administracións involucradas. Vaise aproveitar de forma racional os recursos e as infraestruturas que existen en todo o territorio galego, aos que se dotará de persoal cualificado para a realización de actividades de difusión e formación”, engadiu a secretaria xeral.

“Darase a posibilidade de que se adhiran os concellos que conten con centros propios ou dependentes de deputacións, isto permitiranos cubrir 227 dos 315 concellos de Galiza”, avanzou.