Uns pasos máis atrás, pero próximos á cabeceira da manifestación, circulaban as pancartas dos grupos da oposición, encabezadas polo portavoz nacional do BNG, Guillerme Vázquez, e o secretario xeral do PSdeG, Manuel Vázquez.

En declaracións aos medios, o líder dos socialistas galegos asegurou que tanto o presidente da Xunta, Alberte Núñez Feixóo, como o seu partido, o PPdeG, están "sos e illados" en relación á súa política lingüística e reclamou a retirada do que rebautizou como "decreto do antigalego". O presidente da Fegamp, Carlos Fernández; a portavoz socialista, Mar Barcón; o presidente da Deputación de Lugo, Xosé Ramón Gómez Besteiro; ou os portavoces de Educación e Lingua, Guillerme Meixón e Francisco Cerviño, foron outros socialistas que acodiron á manifestación.

Pola súa banda, Guillerme Vázquez constatou que a norma que pretende impulsar a Xunta é para "recortar dereitos e presenza do galego", fronte ao que contrapuxo "o orgullo de ser galegos" e o "dereito a vivir en galego". O líder 'nacionalista' estivo acompañado de destacados membros da organización frontista, como o portavoz no Congreso Francisco Jorquera; Francisco Rodríguez; ou os parlamentarios Fernando Blanco, Carme Adán e Ana Pontón.

Tras partir da Alameda de Santiago pasadas ás 12h00, a manifestación percorreu con plena normalidade as rúas da capital galega a través da rúa da Senra; a Praza de Galicia; Doutor Teixeiro; Hórreo; Porta da Mámoa; Praza do Toural; rúa do Vilar; Praza das Praterías; para terminar na Praza do Obradoiro, onde a organización instalou un palco para celebrar o acto central.

Entre outras entidades, participou a directiva do sindicato CIG-Ensino, liderada polo seu secretario nacional, Anxo Louzao, tras unha pancarta na que se lía 'Paremos o decretazo contra o galego'.

Así mesmo, había pancartas doutras organizacións sindicais, como CC OO e STEG; da Asociación de Escritores en Lingua Galega ou da Mesa pola Normalización Lingüística, co seu lema 'Polo dereito a vivirmos en galego' ou 'Eu quero galego'.

Tamén estaban entre os manifestantes Rafael Cuíña, militante do PPdeG e fillo do falecido Xosé Cuíña, ademais de integrante da xunta directiva do Instituto Galego de Estudos Autonómicos e Europeos (IGEA).

A cabeceira da manifestación alcanzou a Praza do Obradoiro perto das 13h00, onde os diferentes membros da plataforma 'Queremos Galego' leron o manifesto no que lle reclaman á Xunta "que cumpra coa súa obriga de promover a lingua galega, para garantir a súa igualdade" co castelán.

Tras as intervencións de Iria Taibo, da Plataforma, a cantante Uxía Senlle, a actriz Isabel Risco e o actor Carlos Blanco -que fixo un discurso en inglés e en galego- ante un Obradoiro repleto, tomou a palabra Carlos Callón para recordar que a defensa do idioma é algo "máis profundo que as ideoloxías políticas", que constatou ante "unha mobilización unitaria".

O portavoz da plataforma e presidente da Mesa agradeceu "o clamor unánime do pobo galego", que contrapuxo aos que tacharon a marcha de "defensa dunha ditadura lingüística", en alusión ás declaracións do secretario xeral do PPdeG, Alfonso Rueda.

"Temos un presidente da Xunta que non nos merecemos", ironizou Callón, ao considerar que "só loitou contra o seu pobo". Posteriormente, reiterou a súa petición de "dimisión" do conselleiro de Educación e Ordenación Universitaria, Xesús Vázquez, por "non retirar" un decreto do idioma que tachou de "anticonstitucional" e que "só conta co apoio do PP" e "dunha asociación vinculada" a ese partido -en alusión a Galicia Bilingüe-.

"E non valen medias tintas, hai que estar si ou si con Galiza", concluíu Callón, parafraseando de novo unha cita de Uxío Novoneyra, homenaxeado este ano no Día das Letras Galegas. Finalmente e tras unha segunda lectura do manifesto, o acto concluíu coa actuación da Asociación de Gaiteiros Galegos e o canto do himno galego.