A maiores, asegurou que "é mentira" que o recurso paralice unha eventual fusión entre as caixas galegas e o acceso ao Fondo de Reestruturación Ordenada Bancaria (FROB) posto que ambas as dúas cuestións non gardan relación. "Outras comunidades que fixeron fusións e sistemas de protección institucional (SIP) nin sequera reformaron a súa lei", ratificou.

"Agora é o momento de mandar parar e facer ben os deberes", resolveu Vázquez, quen chamou ao "diálogo" coas entidades de aforro galegas coa fin de buscar "elementos de unión" entre elas e lograr así unha unión de Caixa Galicia e Caixanova. "Téñeno que decidir elas", sentenciou.

Nesta liña, aclarou que o Goberno central "tampouco pinta nada" na decisión sobre as caixas, polo que enmarcou o recurso ao TC no ámbito de "vixilancia" da Constitución. "Sería un ataque á autonomía do país, porque o Goberno non é ninguén para decidir se hai fusión ou non", resolveu.

"Outra cousa", puntualizou o líder socialista, é a opinión do Banco de España sobre a viabilidade dunha posíbel fusión entre Caixa Galicia e Caixanova, ao tempo que subliñou que esta institución "independente" é quen debe certificar esa solvencia.

Por outra banda, Manuel Vázquez rexeitou confirmar se asistirá ou non á manifestación contra a fusión das caixas galegas convocada polo alcalde de Vigo, Abel Caballero. "Irán todos os que sintan que Vigo está sendo agredida", entendeu, e asegurou non ter "ningún tipo de dúbida" acerca dos "ataques" á cidade olívica. "O PP e Alberte Núñez Feixóo, non só no tema das caixas, están a perpetrar un ataque sistemático para erosionar a política local de Vigo", sentenciou o líder do PSdeG.

Preguntado polas declaracións do rexedor coruñés, o tamén socialista Xavier Losada, quen afirmou que lle importaba "un beldro" a opinión do seu homólogo vigués, Vázquez considerou "lexítima" a defensa dos rexedores da súa cidadanía "en momentos de tensión, se ven que é o camiño". "Prefiro que falen, ás veces, non tanto", chanceou, e concluíu que "se fala tanto dos alcaldes socialistas porque o PP non ten alcaldes".