O cadáver dunha nena é transportado por palestinos en Gaza. Mohamed Salem/REUTERS AI tamén denunciou "a falta de medidas" por parte de Israel para investigar debidamente a actuación das súas forzas durante a operación 'Chumbo fundido' da Franxa de Gaza, "incluídos os crimes de guerra", así como "a súa continua negativa a cooperar coa misión internacional e independente de investigación da ONU", que "pon de manifesto a súa intención de eludir o escrutinio público e a rendición de contas".

Nun informe presentado hoxe –o primeiro de alcance exhaustivo que se publica sobre este conflito–, Amnistía asegurou que durante a ofensiva, que durou 22 días, as forzas israelís "mataron centenares de civís palestinos desarmados e destruíron milleiros de vivendas en Gaza" e advertiu de que estes ataques "violaron as leis da guerra".

Foguetes de Hamás

"A comunidade internacional, dirixida polo Consello de Seguridade da ONU, debe exercer toda a súa influencia para conseguir que Israel coopere plenamente coa investigación Goldstone, que é xa o mellor medio para establecer a verdade", recolle.

Así mesmo, segundo Amnistía, o Movemento de Resistencia Islámica (Hamás) e outros grupos armados palestinos "dispararon centenares de foguetes contra o sur de Israel, que mataron tres civís israelís, feriron decenas máis e obrigaron miles de persoas a evacuar os seus fogares". "Estes ataques ilexítimos constitúen crimes de guerra e son inadmisíbeis", advertiu Rovera.

Armas de alta precisión

O informe de Amnistía Internacional documenta o uso por parte de Israel de armas de guerra "contra unha poboación civil que se achaba atrapada en Gaza sen posibilidades de fuxida". "A magnitude e intensidade dos ataques contra Gaza non tiñan precedente", asegurou a organización. "Entre os 1.400 palestinos que mataron as forzas israelís había uns 300 nenos e nenas e centenares de civís desarmados máis, que non tomaban parte no conflito", agregou.

"Á maioría destas persoas matáronas con armas de alta precisión para disparar, as que contaban con avións de vixilancia teledirixidos non tripulados, cuxo excelente sistema óptico permitía ver con detalle o branco", denunciou a organización. "A outras matáronas con armas pouco precisas –incluídos proxectís de artillería con fósforo branco, substancia xamais utilizada anteriormente en Gaza– que non deben empregarse nunca en zonas con gran densidade de poboación", engadiu.

Os investigadores de Amnistía Internacional comprobaron que as vítimas dos ataques "non morreron por terse visto atrapadas entre dous lumes no curso de combates entre activistas armados palestinos e as forzas israelís, nin porque estivesen servindo de protección a combatentes ou obxectos militares".