Fernando Blanco, conselleiro de Innovación e Industria. AGN Blanco informou de que 36.000 clientes continúan sen subministración eléctrica desde a noite do venres, 14.000 sen liña telefónica fixa e 6.827 sen ADSL –a maioría no norte da Coruña e Lugo–, e confiou en que "no día de hoxe quede resolta case na súa totalidade" a situación.

O titular de Industria considerou que a reacción por parte das compañías en futuras situacións similares debe ser "máis áxil". "Así llo imos a demandar ás empresas", agregou e asegurou que o informe que se derive da investigación deixará "claro como se actúa neste tipo de circunstancias e que medidas se van a pór para reforzar" a resposta.

Ademais, indicou que, a pesar de que a Xunta é "consciente" de que a situación foi "absolutamente excepcional" e de que así o deben entender tamén os cidadáns, farase esta investigación para determinar se é necesario reforzar os investimentos noutro tipo de melloras do tendido eléctrico.

Así mesmo, advertiu de que a neve que cae hoxe en diversas zonas do interior do país pode provocar novos problemas na subministración eléctrica, xa que pode sobrecargar "liñas moi debilitadas" e causar novos cortes, especialmente en zonas rurais.

Atención insuficiente

Blanco criticou a atención dada aos cidadáns por parte das empresas. "Desde logo, temos que mostrar o noso malestar por non reforzar o suficiente as liñas de atención ao público e, en moitos casos, polas respostas que se deron polas propias compañías", dixo e argumentou que "nunha situación de excepcionalidade tamén hai que pór sobre a mesa medios excepcionais de atención".

"O malestar dos cidadáns é normal e merécense que alén do teléfono tamén se lles conteste con todos os datos píosbeis, do mellor xeito e nun tempo adecuado", proseguiu e afirmou isto é "algo que haberá que ter en conta de aquí en diante".

Así, considerou que o que deben facer os usuarios afectados é "recorrer e presentar reclamacións" ante o Instituto Galego de Consumo, aínda que adiantou que as empresas "alegarán circunstancias extraordinarias".

No entanto, recoñeceu o "esforzo" dos operarios, que traballaron "en condicións moi difíciles en moitos casos" e admitiu que "outra cuestión" é que o Goberno desexase que a situación se tivese resolto "hai máis de 24 horas".