Guillerme Vázquez, portavoz nacional do BNG. AGN "Eu nin confirmo nin descarto nada", puntualizou, logo de que os xornalistas lle preguntasen por unha posíbel candidatura á Presidencia da Xunta, e aseverou que "o candidato terá que elixirse no momento oportuno, que non é este".

O portavoz nacional do BNG considerou que non hai présa por resolver esa cuestión porque son "unhas eleccións a catro anos vista", e recordou que "outras contendas electorais son máis urxentes pola súa proximidade".

Neste sentido sinalou que a súa prioridade é envorcarse canto antes na campaña das eleccións europeas, para o que proximamente abandonará as súas responsabilidades de concelleiro de Tráfico e Seguridade Cidadá no Concello de Pontevedra. Aínda que ambos os cargos son compatíbeis, Vázquez dixo ter a "convicción" de que non se poden facerse ben dous traballos que requiren moito tempo e esforzo".

Vázquez, que hoxe recibiu as felicitacións de todos os membros da corporación municipal de Pontevedra, mostrouse tranquilo ante o novo reto, aínda que "decidido e firme". Admitiu que o Consello Nacional do BNG foi convulso "como corresponde a unha organización que acaba de cultivar un moi mal resultado electoral".

Aymerich, portavoz parlamentar

Tras asegurar que o debate é "auga pasada" e que se saldou "sen vencedores nin vencidos", o líder nacionalista opinou que "non hai nada ilóxico" na continuidade de Carlos Aymerich como portavoz parlamentario do BNG, "porque as súas funcións serán as que lle asigne" a formación frontista.

No entanto, considerou que "Aymerich fixo moi ben en pór o seu cargo a disposición da Executiva e en concluír que esta será a que tome a decisión que estime conveniente" e recordou que algo similar pasou no PSOE, cando "Bono foi alternativa política a Zapatero e nada impide que presida o Congreso". "A decisión que se tome na Executiva non terá nada que ver con que un se presentase nunha lista e outro noutra", garantiu Guillerme Vázquez.