Alberte Núñez Feixóo en rolda de prensa. Jessica Barcala/AGN

Os conservadores galegos están a aproveitar a nova polémica sobre o topónimo da Coruña desatada tras as declaracións do alcalde socialista Xavier Losada. Hoxe o presidente da Xunta mostrouse a prol de que, se non hai acordo no Concello esta lexislatura, se someta a referendo a legalidade de 'La Coruña'.

A Lei de Normalización non é un obstáculo para Feixóo

Un topónimo que sería ilegal de acordo a Lei de Normalización vixente, aprobada por unanimidade na época na que o PPdeG de Manuel Fraga dominaba por maioría P parlamento. Alberto Nuñez Feixóo recoñeceu en rolda de prensa este obstáculo, pero mostrouse aberto a reformar a norma se hai demanda social.

“Non hai que terlle medo porque os cidadáns opinen” proclamou Feixóo na rolda de prensa tras o Consello da Xunta nunha das súas habituais declaracións de grandes principios.

Afondando na fenda do PSdeG

O presidente da Xunta apoia a proposta do referendo “se non se pode chegar a un acordo no que queda de lexislatura municipal”. Feixóo mesmo se mostrou disposto a legalizar 'La Coruña' xa. Iso si, reclamou antes que o Concello da Coruña adopte unha decisión por maioría no seu pleno e que esa decisión “respecte a opinión da maioría dos cidadáns”.

As declaracións de Feixóo buscan avivar a polémica no PSdeG. Este partido goberna na Coruña gracias ao apoio do Bloque. O alcalde Xavier Losada desatou a tormenta mediática esta fin de semana, ao mostrarse a prol de legalizar 'La Coruña'. Opción que rexeitan de fronte tanto o BNG como o sector galeguista dos socialistas, grupo de presión que mesmo fixo rectificar ao seu secretario xeral. Así, Manuel Vázquez dixo o luns que o PSdeG apoiaba a cooficialidade se había consenso, pero o mércores corrixiuse e argumentou que A Coruña é o único topónimo válido porque non hai demanda social para cambialo.

'La Coruña' é normal na rúa, segundo Feixóo

Argumentación contraria a de Feixóo. “Ninguén está en contra do topónimo A Coruña, a cuestión é se legalizamos o outro topónimo que é utilizado con normalidade nas rúas”, dixo esta mañá en Santiago.

Por que non 'Sangenjo'?

Modificar a Lei de Normalización para admitir 'La Coruña' abriría a porta a rescatar outros topónimos deturpados como 'Puentecaldelas' ou 'Sangenjo'. Preguntado sobre este risco, Feixóo recoñeceu que non se trata dun debate “prioritario” pero que hai varios municipios que xa teñen acordos plenarios nos que se solicita un cambio do topónimo.