Gustoume Trashorras. Dixo o que pensaba sen que houbese nas súas palabras nin reproches nin egoísmo. Os datos avalan o seu bo estado de forma no último mes e deixalo na bancada sempre é un luxo, nestes momentos un malgasto, opino.

Á parte de ser o máximo goleador do equipo e ter un alto índice de asistencias, Trashorras é un tipo de futbolista que enriquece máis que o avecrem. Ten imaxinación, talento, técnica e esa pinga de xenio capaz de encontrar a mellor opción entre mil.

Quizais estou esaxerando e non hai ningún futbolista imprescindíbel. Pode ser. Pero reto a calquera, incluído Eusebio, a que me digan cales foron as vantaxes de non contar co de Rábade, nin tan sequera como recambio para a segunda parte.

Eusebio non xustificou a súa convocatoria para o partido contra o Salamanca. Paréceme lóxico. Pero si deu unha mensaxe: non quere que ningún dos vinte e tantos xogadores que forman parte do plantel se sinta alleo, deixe de estar motivado na segunda volta. Como estratexia de xestión humana paréceme de manual e non podo oporme. Pero é esa a prioridade do Celta arestora?

Quero dicir que neste momento o Celta ten unha necesidade urxente de gañar partidos, en especial na casa. E esa ansia competitiva debería estar por riba de calquera outra cousa. Se para gañar hoxe hai que "incomodar" algúns membros do equipo, non paga a pena o sacrificio? E digo máis. Non será peor o remedio que a enfermidade? E se é Trashorras o que considera que o seu traballo e o seu esforzo non serven de nada? Interésanos máis que estea a gusto o 10 ou Danilo, por poñer un exemplo?

O Celta vive un momento moi transparente. Iso hai que agradecerllo a Eusebio. Non é un técnico con exceso de protagonismo nin quere aparentar ser todopoderoso, algo moi común noutros adestradores, incluso nos moi bos. As súas decisións teñen aínda as costuras á vista, como todas as técnicas aínda non automatizadas. Esa inexperiencia tena que corrixir a base de caer e levantarse. Espero que a convocatoria do último partido sirva para que se dea conta de que, se quere triunfos, por riba dos esquemas, por riba dos compromisos cos seus xogadores, agora prima premiar o esforzo, apostar polos que teñen electricidade nas pernas e o corazón a brotarlle no peito. Trashorras é un deles; Túñez, por certo, é outro. Curioso que nese caso Eusebio si premie o compromiso e poña como titular un rapaz con moitísimos menos galóns que David Catalá. Nese caso, as estatísticas danlle a razón e fai ben usalas ao seu favor.

Oxalá para o partido contra o Levante volva facerlles caso: Hai xogadores como Danilo, Botelho ou Noguerol que están uns chanzos por baixo de homes como Vasco Fernandes, Michu, Toni Rodríguez, Papadopoulos ou Dani Abalo en nivel de fortaleza mental e concentración. Sería bo que todos tivesen oportunidades. Pero mellor deixar iso para cando o equipo estea a salvo. Que opinades?