Evo Morales

Unhas tres horas despois de que as primeiras sondaxes ratificaran ao presidente de Bolivia con máis do 60 por cento dos votos, Morales encabezou unha buliciosa celebración na rúa fronte ao pazo gobernamental na Paz. Alí prometeu, ao grito de “patria ou morte, venceremos”, seguir coa súa política socialista.

Evo Morales asegurou que vai respectar a “lexitimidade” dos prefectos opositores, ratificados tamén no mesmo referendo, e ofreceulles compatibilizar os seus procesos de autonomía cunha nova Constitución, buscando resolver a crise política que ameaza con dividir o país.

“Estamos acá para seguir avanzando na recuperación dos recursos naturais, na consolidación das nacionalizacións, na recuperación das empresas do Estado”, proclamou ante decenas de miles dos seus seguidores que lle pedían “man dura” con algúns opositores.

O ton do presidente boliviano contrastou co ameazante discurso previo do tamén ratificado prefecto de Santa Cruz, Rubén Costas. O líder dereitista advertiulle ao Goberno que se mete nunha “rúa sen saída” se pretende seguir adiante co seu plan de cambio constitucional.

Primeiro referendo

Morales, que asumiu o poder en xaneiro de 2006 e ese mesmo ano nacionalizou a industria de hidrocarburos –que exporta vitais subministros de gas á Arxentina e ó Brasil-, saudou a participación cidadá no primeiro referendo revogatorio dun mandato efectuado no país.

Ademais, o presidente de Bolivia sinalou que, tras a súa ratificación, ten a obriga de unir aos bolivianos, algo que, asegurou, só será posíbel “xuntando a nova Constitución cos estatutos autonómicos”, aprobados sen permiso do Goberno por catro departamentos liderados por Santa Cruz, o motor económico do país máis pobre de Sudamérica.

“Convoco a todos os prefectos a traballar primeiro pola unidade dos bolivianos, respectando as normas”, engadiu, sen dar sinais de cando vai ter lugar o anunciado referendo para aprobar a nova Constitución “plurinacional” e de liña socialista.