Ana Romaní, premio Marisa Soto 2009 Segundo a profesora de lingua e literatura galega da Universitat de Barcelona, "por "motivos económicos" a Radio Galega decidiu prescindir das colaboracións de opinión no Diario Cultural". Neste programa que se emite de luns a venres entre as  15.05 e as 16.00, os últimos minutos estaban dedicados a un espazo de opinión sobre cultura: Helena González falaba os luns, o escritor Bieito Iglesias os martes, Xosé Carlos Caneiro os mércores, a xornalista Débora Campos o xoves, e Miguel Anxo Murado os venres.

González expresa no seu correo o seu agradecemento á directora do programa, Ana Romaní (recentemente premiada co Marisa Soto, premio de honra dos María Casares, polo seu labor á fronte deste programa, e o premio da AELG), e ao seu equipo de xornalistas, "que desde hai anos veñen facendo posíbel unha excelente información cultural, atenta ao que acontece en Galiza e no mundo, plural e publicamente recoñecida".

Diario Cultural é un dos programas diarios de información cultural máis veteranos de radiodifusión galega: comezou na temporada 1990-1991 cun formato que conxuga características dos informativos e mais da revista. O programa concíbese como un espazo de información, plataforma de divulgación cultural e foro de reflexión e debate atento ás novas fórmulas artísticas e creativas. González remata o seu correo afirmando "Xa que non me foi posíbel facelo nas ondas, coa derradeira entrega que se emitiu, despídome desta navegación, convencida da necesidade de manter o obxectivo que me propuxen: catar e debater a cultura, desde o feminismo, é dicir, criticamente". Os seus comentarios poden consultarse no blog Das orixes de marzo.