Calquera tema que propoña o executivo comunitario, a Comisión Europea, que pase polos órganos lexislativos, ou sexa, Consello e Parlamento Europeo, afecta a Galiza. Calquera. Non só ás que se refiren a fundos estruturais, pesca, agricultura ou transportes, como algunha xente quere pensar. Calquera proposta, porque a Unión Europea non só decide sobre o visíbel, senón tamén sobre o invisíbel, e nun mundo globalizado os temas son comúns, conexos, parellos. No caso do Parlamento Europeo, non ten competencias colexislativas totais mais vai ter moitas máis competencias no futuro xa veciño. E só con posicións identitarias de tipo nacional, anticipativas e de coordinación poderemos asumir que as decisións de Bruxelas tamén son decisións galegas, para o positivo e para o negativo. E por iso cómpre ter posición sobre todo tipo de temas. Até o xoves, 25 a Eurocámara decide sobre temas tan importantes para Galiza coma os transportes marítimos (propostas sobre seguranza maritima, información sobre o tráfico marítimo, accidentes, responsabilidades dos transportadores, inspección de buques polo Estado de porto), telecomunicacións, os inaceptábeis actos de pirataría no mar como os acontecidos en Somalia, a comercialización de augas naturais, o software libre, etc.

Un exemplo do invisíbel. Hoxe, o trasego de empresas de telecomunicacións e informática é a tónica que se visualiza ás portas dos despachos europarlamentares, nas esperas dos anscensores do edificio. Lobby dixit. E todo polo chamado e controvertido "Pacote Telecom", conxunto de propostas lexislativas sobre telecomunicacións presentadas polo executivo comunitario diante da Comisión Europea, que se vai votar o 24 de setembro na sesión plenaria. Como ben saben, celébrase normalmente –se é dunha semana– en Estrasburgo pero por mor da caída do teito do hemiciclo da sede francesa, esta sesión e a pasada se celebran en Bruxelas. Foi moi debatido dende hai uns meses, con máis de 800 emendas, e en especial cunha contestación na rede, pois as medidas propostas aféctanlles aos dereitos dos usuarios: garantía dun servizo universal, prezos equitativos e transparentes e a protección da privacidade e dos datos persoais, entre outros. E máis.

Veremos o resultado das votacións para ver as consecuencias, tamén para Galiza.