Por outra banda, Núñez Feixóo aproveitou o encontro para deixar sobre a mesa demandas concretas en materia de dispersión e avellentamento. Tamén esixiu que, por vez primeira, compute a poboación emigrante para a repartición dos fondos do financiamento autonómico.

En concreto, o presidente galego reclamou que a dispersión pondere un 1,2 por cento na repartición de todos os recursos do novo modelo financeiro, cando até o de agora só se aplicaba esta porcentaxe -tras o cálculo do custo de servizo por habitante- ao 50 por cento dos fondos a repartir entre as comunidades.

Con respecto ao avellentamento, o presidente galego non estipulou ningunha porcentaxe, pero demandou que se estabelezan até sete grupos de idade -intervalo de 0 a 4 anos, de 5 a 14, de 15 a 44, de 45 a 54, de 55 a 64, de 65 a 74, e de máis de 75 anos- para calcular con maior precisión o custo dos servizos e a repartición dos fondos en materia de sanidade, servizos sociais e dependencia.

O cumprimento destes tres obxectivos é, segundo Feixóo, "incuestionábel" e "asumíbel politicamente". Pola súa banda, Manuel Chaves eludiu pronunciarse acerca de se o Goberno central aceptará ou non as porcentaxes que demanda Galiza e insistiu en que o obxectivo no que se vai a traballar" é o do 7,1 por cento.

Feixóo e Chaves realizaron unha avaliación positiva da reunión na que, segundo o presidente galego, a única "guía" foi o acordo selado na Cámara autonómica cos grupos da oposición -PSdeG e BNG- para "defender" os intereses da comunidade e sentar as bases dun sistema de financiamento "solidario".

Pola súa banda, Chaves eloxiou o ton "agradábel e amábel" do encontro que situou nun marco de "lealdade institucional" e insistiu en que o compromiso do Executivo estatal é o impulso dun sistema de financiamento multilateral que, matizou, é "compatíbel" coas negociacións bilaterais para que o Estado poida coñecer de cerca as distintas necesidades de cada autonomía. Iso si, coincidiu con Núñez Feixóo en que o obxectivo final debe ser un sistema solidario "que trate a todos por igual".

No canto á xuntanza que manteñen hoxe en Valencia un grupo de comunidades que reformaron os seus estatutos de autonomía na pasada lexislatura -Andalucía, Aragón, Catalunya, Comunidade Valenciana, Illas Baleares e Castela e León-, Manuel Chaves desvinculouna do financiamento autonómico. "Trátase dunha nova reunión daqueles territorios que contan cun estatuto de terceira xeración e xa houbo outros", indicou Chaves e concluíu que "non ten absolutamente nada que ver co financiamento".

Así mesmo, recordou que no outono se reunirá a conferencia de presidentes autonómicos -convocada polo presidente do Goberno central, José Luís Rodríguez Zapatero- para abordar outros asuntos de interese para as comunidades.