A tataraneta de Manuel Curros Enríquez, Miryam Gilbertson, participará, xunto con outros familiares do autor, nos actos conmemorativos que terán lugar na localidade ourensá. Ás 13.00 deste sábado 10 de maio, recibirase ás autoridades e a Banda Municipal tocará na Praza Maior de Celanova. Está prevista a asistencia do ministro de Cultura, César Antonio Molina, e da conselleira de Cultura, Ánxela Bugallo.

A voz de María do Ceo fará rexurdir varios poemas de Curros Enríquez. O seu disco María do Ceo canta aos poetas de Celanova presentarase o 11 de xuño na Casa de Galicia en Madrid, e nel recolle poemas do propio Curros, de Celso Emilio Ferreiro, X. L. Méndez Ferrín, Armando González López e Castor Elices. Xa ás 14.00, un xantar no Mosteiro de San Rosendo servirá para lembrar os multitudinarios actos do centenario do nacemento do autor, que tivera lugar en Celanova o 16 de setembro do 51. A seguir, unha ofrenda floral perante o monumento de Curros e a inauguración dunha placa poranlle o peche á xornada, xa ás 17.00.

Inaugurarase tamén unha exposición titulada co verso do poeta "Na fronte unha estrela". A través de cen pezas orixinais, referencias bibliográficas e iconográficas, e mesmo fotografías descoñecidas até agora, achegadas pola RAG e a Fundación Curros Enríquez, poderemos achegarnos un chisco máis ao autor celanovés. Destacan as súas lentes ou a coroa coa que o nomearon "poeta nacional" en 1904, amais de todas as primeiras edicións e o libro de honra que recolle, no 1905, o seu nomeamento como membro numerario de honra na Academia.