Juan Rodríguez Marticorena, candidato de AVE Se de proxectos novidosos se trata, o partido que máis racha coas convencións políticas de entre todos os que se presentan ás eleccións do 9 de marzo é a AVE (Asamblea de Votación Electrónica). Por que? Pois porque non é habitual atopar unha formación que renuncie “a ideoloxías, a participar no Goberno e a recibir financiamento de créditos bancarios”, como eles propugnan.

A clave do proxecto, segundo explica Juan Rodríguez Marticorena (segundo na candidatura ao Congreso pola Coruña), é activar todo o seu movemento a través dunha “asemblea virtual”, buscando atraer aos abstencionistas “que non están satisfeitos coa oferta que aparece e que non van estar representados”.

AVE naceu o pasado mes de novembro polo afán dun grupo de amigos da Coruña e Santiago de Compostela. “Falabamos de política cada un dende a súa perspectiva, académica e non ideolóxica”, comenta Rodríguez Marticorena, que sinala que o expuxeron como un reto contra o “moito falar e non facer nada”.

Utilizan “todos os recursos que Internet pode aportar” e pretenden exercer como unha especie de “Pepito Grillo” trasladando as súas posicións “aos profesionais” da política.

Cotexar os distintos puntos de vista

Teñen tres compromisos básicos: “brindar información o máis independente posíbel, dando sempre o punto de vista dos terceiros”, “crear un ámbito de discusión de todas as ideas, porque a información debe cotexarse” e “trasladar de xeito transparente o que decida a asemblea no momento dos votos”.

Temas abertos como as células nai ou o cambio climático

Segundo explica Juan Rodríguez, exercerán unha especie de “reserva” de votos e, cando algún dos votantes queira presentar algunha proposta na asemblea, poderán recuperalo e expresarse con voz propia. “Moitos dos problemas que se van plantear agora non teñen unha solución preestabelecida, como poden ser as células nai ou o cambio climático. O que queremos é que cada persoa, segundo a súa capacidade e coñecemento, exprese distintos puntos de vista”, sinala.