Laboratorio de Investigación. Paco Vilabarros

Son datos do informe 'Evolución da produción científica do Sistema Universitario de Galicia nas bases de datos ISI 2002-2006', elaborado polo Consorcio de Bibliotecas Universitarias de Galicia (Bugalicia).

O traballo sinala que no período 2002-2006 a produción científica en Galiza alcanzou a cifra total de 11.818 documentos publicados, cantidade que agrupa, ademais das levada a cabo nas universidades, as do sistema sanitario, dos centros asociados ao CSIC, dos organismos públicos de investigación, da empresa privada, da Administración e doutros centros de investigación.

O informe indica, ademais, que a produción científica por documentos publicados representa o 6,7 por cento de todo o Estado, que neste período chegou a editar 175.221 documentos nas revistas das bases de datos de Thompson-ISI, instituto de información científica especializada na análise de citación ou factor de impacto de miles de revistas de todo o mundo.

USC, á cabeza

A Universidade de Santiago (USC) encabeza a lista por número de documentos, con 5.383 dos 9.044 publicados; seguida da Universidade de Vigo, con 2.954; e da Universidade da Coruña, con 1.380.

Deste xeito, no período 2002-2006 a produción científica global das tres universidades galegas amosa unha curva ascendente ano tras ano, cun "pequeno descenso", de só nove documentos, en 2004 con respecto ao anterior.

No exercicio 2002, o conxunto de todo o Sistema Universitario de Galicia proporcionou 1.618 publicacións, que no ano 2003 xa foron 1.793, en 2004 baixou a 1.784, e en 2005 volveu alcanzou as 1.850, mentres que se pechou 2006 con 1.999.

Por universidades, destacan dúas excepcións. Este é o caso da USC, cando a cifra de documentos publicados dos anos 2004 e 2005, con 1.048 e 1.070 documentos, respectivamente, foi inferior á cifra de 2003, no que se contabilizaron 1.110 publicacións.

Tamén é o caso de A Coruña, que nos anos 2004 e 2005 foron de menor produción que o exercicio 2003, aínda que as diferenzas, segundo subliña o informe, son "máis atenuadas" que na Universidade de Santiago.

Por iso, o ano máis prolífico do período de estudo foi o exercicio 2006, cando, en conxunto, as tres universidades publicaron un total de 1.999 documentos, dos cales 1.145 corresponderon á USC, 686 a Vigo e 298 á UDC.