O costureiro ourensán reprobou a falta de reformas que caracterizou os últimos anos e que, recordou, impulsaron José María Aznar e Felipe González -a diferenza de José Luís Rodríguez Zapatero, como sinalou-. "O colectivo social está afrontando o peor tsunami da Historia sen medidas, que nos pode levar á quebra, como a Grecia".

En resposta a preguntas dos xornalistas, considerou que elevar a idade de xubilación dos 65 aos 67 anos ten "toda a lóxica do mundo", ao recordar que as persoas viven unha media de 80 anos en España. "Ademais, farase, protesten o que protesten", augurou. "Pódese atrasar. Van vir unhas relacións laborais máis flexíbeis, quéirase ou non", reiterou, a pesar de advertir que a demora en introducir esas reformas quitará aos empresarios "armas para competir".

Domínguez lamentou que os líderes políticos, dos que asegurou que "quizais reflicten á sociedade que os vota", teñan soños "igualitarios e identitarios". "Hoxe nas clases o ritmo adáptase ao pelotón dos torpes, esquecémonos dos superdotados", criticou, para defender a súa segregación en grupos de igual modo que ocorre nos países anglosaxóns.

"En España hai unha obsesión, un delirio, pola igualdade. Por que hai que machucar os superdotados e os máis intelixentes?", preguntouse, en referencia a un colectivo que, ao seu xuízo, representa entre un 5 e 10 por cento da sociedade. "Todas as familias teñen diñeiro para cear fóra unha ou dúas veces á semana e non para educar os seus fillos", reprobou, convencido de que a sociedade española, "pouco educada", é culpábel desta situación, que non só compete ao Estado.

"Temos unha sociedade pouco educada, con menos enxeñeiros e sociedade científica da que podemos ter. Aquí coñecemos a futbolistas, cantantes e até escritores", aseverou, para lamentar a falta de científicos. "O que temos que cambiar é o acento que puxemos na educación nos últimos 30 anos", manifestou.

O empresario ourensán negou que a súa firma estea reducindo persoal e asegurou que, pola contra, o está "aumentando". Nesta liña xustificou as perdas rexistradas ante a crise, aínda que sinalou que a súa empresa non está "en liquidez negativa". "Seguiranme vendo aquí dentro de 20 anos".

Así mesmo, recordou que na actualidade Adolfo Domínguez exporta o 25 por cento da súa produción, aínda que aspirou a que, dentro dunha década "como máximo", a súa firma só realice en España o 10 por cento das súas vendas, polo que entendeu que este sector "está facendo os deberes".

Preguntado polas súas diferenzas con Zara, definiuse como un "costureiro", mentres que entendeu que a firma de Amancio Ortega é "un gran comerciante". "Quizá o mellor comerciante téxtil da Historia e é obvio que estamos no mesmo sector", apuntou.