A parlamentaria do BNG admitiu que tamén hai científicos a prol dos transxénicos, pola "súa proximidade ao poder económico". "É evidente que non hai consenso na comunidade científica é cómpre investigar máis", argumentou.

A vicepresidenta do Parlamento dixo que os riscos dos tranxénicos son maiores que as vantaxes e dixo que "as normas e leis deben favorecer aos cultivos tradicionais".

Paz argumentou que o millo transxénico que se cultiva en Galiza é inmune a unha enfermidade que non se dá no país. Ademais, alertou de que "non hai garantías absolutas sobre a súa salubridade para a alimentación humana".

Postura do PSdeG

Por parte do PSdeG, Marisol Soneira, lembrou que o millo galego é máis resistente grazas ao traballo dos científicos, entre os que citou a Ruíz Gallestegui a comezos do século XX.

Os organismos xeneticamente modificados son o produto acelerado da evolución, argumentou Soneira ante un hemiciclo no que a metade dos parlamentarios estaba ausente. "A tecnoloxía non é mala por si mesma", indicou a socialista. Soneira citou á recuperación do porco celta como un dos beneficios recentes da xenética para Galiza. "A democracia non é só votar cada equis tempo, senón que todas as capas da poboación poidan acceder á alimentación", argumentou a parlamentaria, que tamén apostou por "fomentar os produtos tradicionais".

Soneira reclamou "información exhaustiva" para o consumidor. "Só a través da investigación as nosas empresas agrarias poden ter futuro", dixo.

Intervención do PPdeG

Por parte do PPdeG, Roberto Castro, denunciou o "fume" e a "demagoxia do BNG" porque a a lexislación da UE di que "é ilegal impedir localmente a produción de cultivos xeneticamente modificados". Castro reitereou que os agricultores do país, á marxe do que decida o Parlamento, poderán cultivar transxénicos.

Por iso Castro cualificou a proposta de Paz de "compromiso ideolóxico probabelmente para consumo interno da UPG". "Cando existan estudos avalados científicamente que demostren un perigo contra a saúde animal ou humana será o momento de prohibir", argumentou. Ademais lembrou que a prohibición francesa do millo Mon-810 foi retirada por carecer de base científica.

O PP propón que as universidades galegas estuden os perigos e que logo o Parlamento decida. Tamén reclamou un "apoio oficial a proxectos de enxeñería xenetica aplicada á investigación".

Vacas tolas

Paz respondeulle que, efectivamente, tratábase dunha reclamación ideolóxica, como todas as que se fan na Cámara. "Non queremos facer o que fixeron vostedes sempre, deixar que Europa decida sen que Galiza se pronuncie", espetoulle. A parlamentaria dixo que Europa dálle prioridade aos intereses das multinacionais á seguridade alimentaria.

A deputada do BNG reclamou que se tomen medidas "antes de que estea constatado" o risco, ao contrario do que sucedeu co caso da enfermidade das vacas tolas.