O conselleiro de Presidencia, Méndez Romeu, en rolda de prensa A Xunta de Galicia unificará todas as súas canles de contacto coa cidadanía este ano. Segundo adiantou esta mañá o conselleiro de Presidencia, Xose Luís Méndez Romeu, un redeseño do portal actual “integrará as informacións de todas as páxinas web da Xunta –unhas 400 páxinas- e dun xeito visual e rápido para que o cidadán teña que facer menor número de movementos ou clics para chegar ao que busca”.

Presidencia asegura que o novo portal basearase nunha estrutura xerarquizada e organizada en base a “feitos vitais”, é dicir, en base ao que lle interesa aos cidadáns para a súa vida, e non por estruturas administrativas como até agora.

Romeu dixo que así "Galicia se sitúa ao mesmo nivel das comunidades máis avanzadas", pois dous terzos das españolas xa dispoñen deste modelo, "e das grandes empresas".

Aumentan as consultas telefónicas

Algo similar sucederá no caso da atención telefónica. O 012 unificará de xeito progresivo aos actuais 54 especializados que existen na Administración autonómica, que pasarán a ser utilizados de xeito interno.

En rolda de prensa, Méndez Romeu destacou que dende que se iniciou unha campaña con anuncios en televisión subiron un 20 por cento as chamadas a este teléfono e que o obxectivo final é que "os cidadáns non acudan ás oficinas administrativas" e poidan ser atendidos de xeito "áxil e eficaz" a través deste medio.

Quince teleoperadores para toda a Xunta

Este novo servizo telefónico comezou en maio, cando recibiu 8.500 chamadas, das que o 61 por cento foron resoltas neste, o 38 por cento derivadas e o 1 por cento precisou unha rechamada ao cidadán.

Neste momento hai 15 teleoperadores que atenden esta información, aínda que existe un modelo escalable para número de chamadas ou novos contidos sectoriais para que se vaian incorporando máis se é necesario. O horario de atención é de 8.00 a 22.00 horas os días laborais.