Helicóptero de salvamento marítimo. pesca1    1 / 2    

A nova Xunta do PP descartou a compra dun helicóptero para unha nova base de salvamento en Cee. Así estaba previsto e orzamentado polo bipartito. De feito, o concurso para mercar a aeronave estaba a piques de ser adxudicado.

O Goberno segue a alegar que o motivo principal da eliminación do helicóptero non é a “austeridade” da que presume Alberte Núñez Feixóo. A Consellaría do Mar insiste en que a “finalidade principal é facer máis eficaz o servizo” mediante unha ampliación das tripulacións dos actuais aparellos.

“A renuncia ao contrato suporía un importante aforro”

Versión que se contradí co documento oficial, que hoxe adianta ANT, no que a consellaría xustifica a paralización do concurso por motivos exclusivamente económicos. “A situación económica de crise xeralizada que aconsella realizar un plan de aforro con reducir o gasto público” é o argumento do documento que asina o secretario xeral, Francisco Xosé Vidal-Pardo, o 14 de maio.

É máis, a Xunta insiste en que “a renuncia a celebración do contrato suporía un importante aforro para os orzamentos”. O custe previsto da aeronave rondaba os 13 millóns, mentres que 300.000 sería o orzamento da nova base de Lires (Cee), a primeira para os helicópteros na Costa da Morte, a zona con máis sinistros, e próxima ao Hospital da Costa.

A ampliación de Vigo foi deseñada polo bipartito

Como alternativa –e no medio das críticas lanzadas dende a oposición– a consellaría presentou esta semana a ampliación da tripulación do Pesca 1, baseado en Vigo. Agora haberá pilotos e rescatadores, subcontratados a INAER (a antiga Helicsa) 24 horas.

O novo Executivo apresurouse a presumir de o novo persoal. Con todo, o certo é que a ampliación da tripulación fóra aprobada polo bipartito, como proba que os novos pilotos levaban meses a adestrarse antes de entrar en servizo esta semana.

Promesas de máis persoal subcontratado en Celeiro

A Xunta alega, ademais, que a conselleira Rosa Quintana tamén ampliará a tripulación do Pesca 2 en Celeiro. Quintana promete que será no 2010, o que permitirá reducir o “tempo de resposta” de 30 minutos a 10 minutos, ao igual que en Vigo.

Iso si, o Goberno non facilita cifras de canto máis pagará a INAER pola ampliacións das tripulacións. Polo tanto, é imposíbel comprobar se realmente se está a cumprir coa redución do gasto alegada no documento que publica ANT.