Grupo de investigadores que participaron en Vigo na reunión previa ao desenvolvemento do proxecto.. Duvi

A Universidade de Vigo foi designada pola Axencia Espacial Europea (ESA) 'nodo' de operacións en Europa de GENSO, a nova rede mundial de satélites non comerciais –científicos, de investigación e educativos- e, en bandas libres.

Esta designación sitúa á Uvi como “referente mundial dentro dos sistemas de pequenos satélites”, segundo destacou o profesor Fernando Aguado, investigador principal do proxecto Xatcobeo, punto de partida de todo o proceso, que porá en marcha unha constelación de pequenos satélites distribuída por todo o mundo que permitirá recadar á comunidade científica múltiple información.

Xatcobeo

O proxecto, liderado pola Axencia Espacial Europea, conta coa participación da NASA, o Departamento de Defensa do Goberno americano e a axencia xaponesa JAXA, así como arredor de 200 universidade de todo o mundo. Helen Page, que dirixe o plan destacou que o proxecto da Uvi foi elixido polo seu “carácter multidisciplinar e a aposta do campus vigués pola tecnoloxía”, así como as conexións que os investigadores da Uvi teñen con toda Europa, América, Asia e África.

O profesor Fernando Aguado, comentou que o  Xatcobeo foi o xerme que permitiu crear a infraestrutura de investigadores que na actualidade gozan de recoñecemento e proxección internacional.

No proxecto participan máis de 60 investigadores de Vigo e Ourense, docentes e estudantes de doutoramento e de proxectos de fin de carreira de oito grupos de investigación. A ETSE hai ique sumar as escolas de Informática e as dúas de Industriais, así como as facultades de Química e Ciencias.

Para a posta en marcha do proxecto acaba de celebrarse en Vigo un seminario no que participaron 25 investigadores de Europa e América para acordar os requisitos que debe cumprir o software que se empregará de forma libre para construír a rede mundial de seguimento de satélites que deberá estar preparada en maio ou xuño deste ano.