Manuel Vázquez, secretario xeral do PSdeG. AGN Como político curtido que é, comprende a todos: aos ecoloxistas, ás empresas e aos cidadáns dun e outro bando. As decisións, son outra cousa. O conselleiro de Medio Ambiente, Manuel Vázquez, insiste sobre todo nun aspecto: a gran diferenza coa Xunta anterior.

Comezou sendo un dos conselleiros mellor valorados e acaban de “galardoalo” (ex-aequo con Fernando Blanco) co premio Cemento á Peor Actuación Ambiental. Rematou a tregua?

Eu son un coñecedor da política galega desde hai moitos anos, e a política de protección medioambiental que adoptou este Goberno nunca a soñaría nengún outro goberno. Protección de Rede Natura, política de protección do litoral, paralización de minicentrais que reventaban os ecosistemas fluviais... Parece que estou vendendo unha moto, pero a verdade é que se deu un salto en dous anos e medio absolutamente xigantesco. Por definición, os colectivos ecoloxistas sempre teñen que decir que todo falta por facer, é lóxico. Falta moito por facer, pero é indiscutibel que fixemos máis nós en dous anos que en 16 o Goberno anterior.

Quizáis había expectativas máis elevadas do cambio?

Adiantamos pola esquerda á maioría dos colectivos. Quen esperaba que paralizasemos todas as minicentrais que están en trámite? Ou que retiresemos as piscifactorías de Rede Natura? Este Goberno tomou medidas potentísimas pero a veces dánse paradoxas, como que aparezan grupos ecoloxistas defendendo que non se faga a depuradora de Ribeira, porque contamina. Non, o que contamina é non ter depuradora. Ás veces é máis fácil sucumbir a localismos fronte á defensa do interese xeral.

O vindeiro 1 de xaneiro terá lugar a cesión do Parque nacional das Illas Atlánticas. Estará listo o plan de xestión e uso?

Practicamente completado. Sen menoscabo do que está facendo Madrid, estou seguro de que a singularidade que vai supor a xestión desde Galicia vai ser moi importante.
Con todo, máis que os planes de xestión, que os hai que ter, hoxe a clave dun parque natural é o plan de sostibilidade. Está demostrado en outras partes do territorio español e do mundo que un espazo natural protexido dinamiza a economía cando se fai ben, non hai máis que ir a Somiedo a Redes... O desafío que temos é tratar de poñer en marcha e convencer, que non é fácil, que en vez de haber comisión de afectados polo parque natural, haxa sistemas de desenvolvemento socioeconómico do parque que temos que protexer.

Tras o desastre do Xallas, imporánse finalmente medidas contundentes a Ferroatlántica?

Está aberto un tema xudicial, e hai tamén un proceso interno en Augas de Galicia e en Conservación da Natureza. Mentres se desenvolve a vía penal, nós temos que estar quietos, recopilando información, pero non nos ten que temblar a man para facer cumplir a lei e pode haber sorpresas. Se algún exemplo hai do que non se debeu facer nun río en Galicia é o Xallas e Ézaro.

Cal é o gran proxecto pendente para o que queda de lexislatura?

O que podemos rematar este ano, pero que se complica, é o saneamento das nosas rías e dos nosos ríos. Se conseguiramos que Galicia cumpla a directiva europea no vindeiro ano 2008, xa xustificaría para min o ter pasado pola política.

A promesa de trasladar Ence de ría de Pontevedra está aínda no aire.

Agora todo o mundo está a dicir que ese tema xá estaba sobre a mesa, pero non é así. Hai unha decisión de todo o Goberno da Xunta de que no 2018 Ence ten que estar fóra da ría de Pontevedra, e eso non o poden minorar. É certo que houbo unha posición inicial belixerante da empresa, e que hai que avaliar os compoñentes laborais, empresariais e sociais, pero agora a empresa está falando.
A gran pregunta sobre Ence é se seremos capaces de adiantar datas, e eu estou convencido de que o imos conseguir. Hai boa sintonía.