Reunión de Touriño e catro conselleiros coa Federación de Promotores de Galicia

Os construtores e promotores galegos valoran positivamente a reunión mantida co presidente da Xunta, Emilio Pérez Touriño, e catro conselleiros, pero coinciden en demandar axilidade en resolver as propostas que lles formularon e nas medidas que ten previsto implantar o Goberno para axudar a estes sectores na actual conxuntura negativa.

En declaracións a Europa Press, o presidente da Federación Galega da Construción, Eligio Nieto, destacou a "cordialidade" do encontro, pero puxo en dúbida que a Xunta poida adxudicar este ano os 1.500 millóns de euros de obra pública aos que se comprometeu no plan de dinamización presentado o pasado xaneiro.

Eligio Nieto precisou que o Executivo autonómico licitou no que vai de exercicio 775 millóns, pero só adxudicou 450, "menos da terceira parte do obxectivo para todo o ano", e advertiu de que "só quedarán catro meses para cumprilo", pois "en agosto está todo parado".

Non obstante, subliñou que Touriño lles manifestou que fará "todo o posible" para responder a este compromiso e os construtores lle demandaron "axilidade", pois consideran que ao ritmo actual non se cumprirán as expectativas e recordaron que "está a aumentar moito o paro" nun sector do que dependen "de xeito directo 160.000 persoas" en Galicia.

Cambios normativos

Nieto tamén alertou da "inseguridade xurídica" que provocan os continuos cambios normativos en materia urbanística, pois recordou que a grande maioría dos 315 concellos galegos "non ten aprobado o seu plan xeral" e as normas subsidiarias en vigor colisionan ás veces coa recente modificación da Lei do Solo.

Pola súa banda, o presidente da Federación de Promotores de Galicia (FEPROGA), Javier Garrido, resaltou que o sector sae deste encontro "coa sensación do comezo de algo", pero alertou de que "xa se perdeu demasiado tempo".

Por iso, solicitaron a Touriño que "se aprobe o antes posible" o plan do litoral, que poría fin á prohibición preventiva de ata dous anos de novas construcións a menos de 500 metros da costa, que concluirá como moi tarde en maio de 2009. Segundo Garrido, Touriño comprometeuse a axilizalo, pero non concretou datas.

Os promotores tamén solicitaron á Xunta que as directrices de ordenación do territorio (DOT) "non teñan a posibilidade de ser interpretado", pois iso levaría consigo "un risco de paralización" que suporía un prexuízo moi importante nun momento de crise económica.

Igualmente demandáronlle "presión" ante as entidades financeiras para poder contar con financiamento nunha conxuntura con problemas de liquidez e a necesidade de relacionar o plan sectorial de vivenda -que pode cualificar chan á marxe do plan- co rexistro de demandantes e os plans xerais, para adaptar "o número de vivendas protexidas ás que realmente se necesiten".

Construtores e promotores tamén valoraron o anuncio de Touriño da constitución dun observatorio en setembro para seguir a evolución do mercado inmobiliario, pero coincidiron en que despois do verán o Goberno deberá ser máis concreto, tras analizar as demandas entregadas por estes sectores.