Antena dunha rede sen fíos Wimax para levar internet ao rural. Quobis.com O procedemento divídese en dous lotes: un primeiro proxecto piloto para probar a tecnoloxía Wimax na banda de frecuencia de 2,5 Ghz nos concellos de Agolada, Meis e Arbo e un segundo, que terá por obxecto probar a frecuencia de banda de 3,5 Ghz nos concellos de Meis, Arbo e Pazos de Borbén.

O primeiro lote foi adxudicado á empresa R Cable e Telecomunicaciones Galicia, S.A., por 233.636 euros e o segundo, á empresa Iberbanda por 236.640 euros.

O plan de implantación do Wimax Rural da Deputación desenvolverá esta experiencia piloto en 25 fogares dos primeiros catro concellos, elixidos polas súas peculiaridades orográficas e nivel e dificultades de implantación de novas tecnoloxías.

A seguinte fase, logo da aprobación do expediente de contratación do servizo, será o despegue da rede, con instalación de torres e enerxía, equipos Wimax e de radioenlaces así como de interconexión coa rede da operadora.

A continuación, a deputación iniciará unha identificación das necesidades reais de cobertura e das infraestruturas existentes, así como comprobar a dispoñibilidade dos terreos para instalar as infraestruturas precisas.

Orzamento

A Deputación de Pontevedra está acometendo os traballos deste proxecto que ten un presuposto inicial de 6.693.868,53 euros, dos cales 4.685.707,97 proceden dos fondos FEDER. A Deputación achega 1.338.773,71 euros e os concellos adheridos ao convenio de colaboración 669.386,85 euros en total.

Concellos á marxe

Os concellos que se adheriron ó proxecto son 55 dos 62 da provincia. Por decisión propia segundo a Deputación, non se adheriron os de Vigo, Pontevedra, Cangas, Vilagarcía, A Estrada, Redondela e Marín que optaron, pola súa conta, a outros proxectos dos citados Fondos FEDER.

A administración informa que o proxecto Wimax Rural en Pontevedra ten o obxectivo de dotar de acceso á internet de banda larga aos cidadáns e empresas fundamentalmente do medio rural da provincia de Pontevedra a un prezo 'asequíbel'.