Un encontro teoricamente doado que se converteu no clásico partido trampa serviu para recuperar con toda a súa grandeza a figura de Valerón. O xogo do mediapunta canario fixo reaccionar o Dépor fronte o pechacancelas Levante e das súas botas saíu o sensacional pase que, tras asistencia de Manuel Pablo, foi convertido en gol por Riki nos últimos minutos e salvou aos branquiazuis dun tropezo que podería complicar as súas opcións continentais, que se manteñen por medio da Intertoto e aínda poden ser de UEFA directa. Europa foi durante moitos anos o territorio natural do mellor Valerón. Quere volver. E pode.

Antes da emotiva aparición do canario, que viña da enésima lesión e tivo media hora, os de Lotina sufriron por mor da frialdade coa que afrontaron o encontro. A suposta facilidade da cita relaxou en exceso aos coruñeses ante un Levante que se comportou na liña de dignidade coa que está a asumir unha tempada crítica. Críticas tamén son as eivas do Dépor na punta cando non está Xisco. O balear ficou na bancada por decisión técnica (“precisa descanso”, dixo o adestrador) e no seu lugar estivo Bodipo. Desastroso. O internacional guineano errou as cinco ocasións das que dispuxo, e algunhas foron moi claras. Foi asubiado cando deixou o posto a Taborda, que tamén fallou unha incríbel. Morriña de Xisco.

Foi na segunda metade cando entrou no campo outro que se botaba de menos: Valerón. Fáltalle ritmo, pero vai sobrado de talento. Cun par de pases rachou a férrea zaga levantina, algo que antes só fora capaz de facer un veloz Willhemsson ou un omnipresente Sergio. Porén, non foi o día do Dépor. Pero si o da maxia canaria con só o 50 por cento da súa capacidade física. Se a recuperación vai ben e retorna o mellor Valerón, Europa volverá saber do Dépor.