Cartel da festa do dezasete Esta ruta cultural pola Compostela de principios do século XX partirá do Museo do Pobo Galego ás 17.00 deste venres, onde se visitará a exposición permanente dedicada á prensa, para despois ir coñecer a libraría Niké, lugar de debate e reunión propriedade de Xoán Xesús González, a imprenta Nós, de Ánxel Casal, ou o obradoiro de Camilo Díaz Baliño. A xornada rematará no Centro Social O Pichel, onde será proxectado, ás 21.00, o documental Quatro anos de Gentalha, que conta como naceu, dun almacén abandonado, o que hoxe é un dos locais sociais máis vizosos de Compostela.

Pero xa este xoves á tarde terán lugar, tamén no Centro Social, as presentacións de Made in Galiza, de Séchu Sende, O home inédito, de Carlos Meixide, e do documental Cascallos, de Tomás Lijó e Carlos Meixide. Indo á festa do 17 (que este ano, por fin, se celebra o dezasete), comeza ás 11.00 cunha ruada e unha concentración no Toural, ás 12.00. Dúo de Ases amenizarán a sesión vermú a partir das 13.00, e ás 14.00, o xantar,a base de polbo e churrasco, estará tamén amenizado con música.

Logo dunha boa sobremesa, nada mellor para facer a dixestión, ás 17.00, ca os xogos populares na Praza do Toural, ou, unha hora despois, o obradoiro de danzas lusófonas. Ás 19.00 comeza o festival da danza, a cargo da Escola Cantigas e Agarimos. Exposicións, ruadas e unha feira audiovisual completan a programación da tarde. E xa á noitiña, arredor das 20.00, comeza a festa.

Os da Ría serán os mestres de cerimonias para presentar a campaña da Fundaçom Artábria, a prol de dedicarlle as Letras Galegas do ano próximo a Ricardo Carvalho Calero. Séchu Sende será pregoeiro nunha noite de concertos, que contará con Ataque Escampe, The Homens, e Sacha na Horta, as gañadoras da última edición de A polo ghit!. Tamén se presenta Transgaliza e terán lugar varios sorteos.