Coches estacionados antes de estaren matriculados

O crecemento intertrimestral situouse dúas décimas por debaixo do incremento rexistrado no trimestre anterior e oito décimas menos que fai un ano, cando a economía española medrara un 0,9% en taxa intertrimestral.

Pola súa parte, o crecemento intertrimestral baixou dúas décimas con respecto ao trimestre precedente (2,6%) e 2,1 puntos en relación co mesmo período de 2007 (3,9%). Ademais representa a taxa máis baixa dende o primeiro trimestre de 1993, cando o PIB aumentara o 1,7 por cento.

O INE atribúe a moderación no ritmo do avance do PIB á desaceleración da demanda nacional, que reduciu 1,3 puntos a súa achega ao crecemento agregado, até 1,5 puntos.

Desaceleración do consumo

O gasto do consumo final dos fogares desacelerou o seu crecemento un punto, ate o 1,2 por cento, en liña cunha evolución máis negativa que no trimestre precedente dos indicadores asociados a esta variábel, como o nivel de emprego, a renda dispoñíbel das familias, as vendas de automóbiles ou a cifra de negocio, entre outros.

Pola súa banda, o gasto en consumo final das administracións acelerouse entre abril e xuño até o 3,8 por cento, dúas décimas máis que no trimestre precedente, debido a unha maior intensidade no crecemento da remuneración dos asalariados destas administracións.

Mentres, o emprego, medido en termos de postos de traballo equivalentes a tempo completo, moderou un punto o seu ritmo de avance no segundo trimestre e rexistrou un crecemento interanual do 0,4 por cento, o que supuxo a creación neta de 69.000 empregos no último ano. A desaceleración conxunta do emprego nas ramas industriais e os servizos, así como a intensificación na redución de ocupados na construción son dous dos trazos que máis destacan neste trimestre, segundo o INE.