Galiza conta con 4,16 médicos por cada mil habitantes. W. J. A central nacionalista pídelle á Administración sanitaria que "dunha vez convoque a mesa sectorial". Respecto diso, a AgM-CIG insistiu no seu rexeitamento á proposta de Sanidade sobre o réxime ordinario de carreira profesional.

Respecto diso, xustifica que a proposta do Servizo Galego de Saúde "exclúe inxustamente" da carreira profesional aos profesionais temporais con máis de cinco anos de servizos prestados, "non considera o período MIR como tempo traballado" a efectos da mesma e "ignora" a promoción interna, tanto vertical como horizontal.

Aforro económico

Ademais, o sindicato sinala que a proposta, de febreiro de 2008, "está demasiado preocupada polo aforro económico" que, segundo matiza, reflíctese tanto na negativa a aceptar "os tempos sobrantes" do acceso ao réxime extraordinario, "como no intento de obrigar aos que accederon a un determinado grao de carreira profesional polo réxime extraordinario a que permanezan nese grao un mínimo de tres anos a pesar de que cumpran xa os criterios de anos de servizos prestados que se requiren para acceder ao seguinte grao polo réxime ordinario.

Tamén considera que a proposta de Sanidade "pretende converter a carreira profesional nun novo complemento de produtividade variábel, esquecendo que son dous conceptos diferentes". Deste xeito, a CIG recorda que a primeira está dirixida, sobre todo, a recompensar o esforzo individual dunha profesional por mellorar e actualizarse profesionalmente, mentres que o segundo ten como fin recoñecer o cumprimento dos obxectivos asistenciais.

Con todo, a central nacionalista sostén que a proposta da Administración sanitaria é "un documento escuro e pouco concreto" nos procesos de avaliación para o paso dun grao de carreira profesional ao seguinte. "Non está nada claro que se avaliará, como avaliará, quen avaliará e cando se farán as avaliacións", puntualiza. "Este é un aspecto esencial para a credibilidade da carreira profesional entre os profesionais e o documento do Sergas está lonxe de tratalo dun modo claro e convincente", conclúe.