Tráfico na ponte de Rande. Sonia Daponte/AGN    1 / 2    

O secretario da CIG na bisbarra de Vigo, Xerardo Abraldes, aposta pola creación dunha empresa pública que xestione a AP-9, unha infraestrutura que considera “estratéxica” para a zona. O líder sindical lamenta que a vía estea “nas mans dunha empresa financeira internacional”, Citigroup, grazas ao acordo subcrito recentemente con Sacyr para mercarlle a súa filial Itínere, xestora da Autoestrada do Atlántico.

Durante a presentación dun informe sobre Audasa, xunto a dirixentes sindicais do Porriño e O Morrazo, Abraldes asegurou que a nova propietaria non vén a Vigo “a prestar servizos senón a seguir especulando e sacar unha boa tallada para tapar buratos doutros investimentos”.

Ademais, denunciou a falla de mantemento das autoestradas da empresa Audasa (titular da AP-9) en aspectos como o estado do firme, a sinalización ou a iluminación, e incidiu en que o feito de que unha empresa pública pase a xestionalas, sen a supresión da peaxe pero dándolle preferencia o bo servizo fronte aos beneficios, suporá unha mellora.

Ponte de Rande

Por outra banda, no canto ao proxecto de ampliación da Ponte de Rande manifestou a súa esperanza en que, de seguir en mans privadas, sexa a concesionaria a que asuma o custo. Malia e todo, amosou o seu desacougo pola ausencia dun “compromiso real” co que, ao seu xuízo, traballa a Administración. “Tememos que pasarán as eleccións, pasará o debate de ampliación da ponte e, despois duns cantos anos, seguirá sen solución”.

Deste xeito, xulgou “necesaria a ampliación” debido ao colapso de Rande e recordou que o Estado dispón de “lexislación para obrigala a facer a obra”. Neste sentido, explicou que unha lei de 1972 afirma que “o concesionario deberá conservar a vía, os seus accesos, sinalización e servizos regulamentarios en perfectas condicións de utilización, facilitando en condicións de absoluta normalidade, suprimindo as causas que orixinen molestias, incomodidades, inconvenientes ou perigosidade aos usuarios da vía”.