Edificio dos sindicatos na Coruña, unha das obras de Eshor. Eshor Segundo a CIG, a empresa, con sede no polígono de Vilar do Colo de Fene, conta cuns 400 traballadores, na súa maioría, inmigrantes procedentes de países como Marrocos, Perú ou Ecuador, contratados no seu país de orixe, e aos que se lles ofrece un contrato indefinido, polo que Eshor recibe bonificacións fiscais do Ministerio de Traballo.

No momento de asinar este contrato laboral, os traballadores, segundo afirmou a CIG, tamén subscriben a súa renuncia laboral nun documento sen data que se fai efectivo no momento no que sofren algún accidente laboral ou unha enfermidade que lles impide traballar. Deste xeito, perden o seu traballo de forma inmediata, sen dereito a indemnización nin prestación por desemprego.

No momento no que sofren un accidente laboral, segundo explicou a CIG, os traballadores tamén son expulsados dos pisos que comparten con outros catro ou cinco compañeiros e que son facilitados pola empresa -a cambio duns 120 euros ao mes que se descontan da nómina- ao comezo da súa relación laboral.

O secretario comarcal da CIG, Xesús Anxo López Pintos, afirmou ademais que os traballadores realizan xornadas laborais de ata 12 horas, incluídos sábados e festivos. Fronte a isto, se reclaman o cobro de horas extras, a empresa os "ameaza" con esa renuncia laboral voluntaria que os deixaría na rúa" sen ningún tipo de compensación.

Críticas á Inspección de Traballo

Aínda que a CIG xa puxo en coñecemento da Inspección de Traballo esta situación, López Pintos asegurou que o organismo, de momento, limítase a "mirar cara a outro lado" sobre este caso de "explotación laboral".

Seis dos traballadores inmigrantes xa recorreron tamén aos Xulgados aínda que, de momento, están á espera de que se emita sentenza. A central sindical nacionalista asegura que son moitos máis os casos que se producen en Eshor, pero que non se chegan a denunciar ante as coaccións ás que son sometidos os traballadores.

Na rolda de prensa ofrecida hoxe, un traballador procedente de Marrocos explicou que realizaban "dez horas cada día", incluíndo "sábados e festivos", sen que a empresa pagáselles horas extras. A isto sumaríase o pago obrigatorio de "120 euros polo piso". Este traballador denunciou que perdeu o seu emprego en canto rompeu un brazo, pero non só iso: "a empresa botoume do piso e non quixo pagarme o mes".

Esclavismo do século XX

Xesús Anxo López Pintos, que cualificou a situación como "explotación da inmigración" e "esclavismo do século XX", apuntou como "cómplices" da empresa a "a Inspección de Traballo", e ao "Ministerio de Traballo, que o único que fai é facilitar man de obra ás empresas, sen preocuparse en facer un seguimento desas persoas".

"Eshor practica un esclavismo, unha manipulación total e ameazas contra os traballadores, que teñen a desgraza como tivemos os galegos moitos anos de ter que emigrar para buscar o pan fóra", asegurou Pintos, quen lamentou que a compañía sexa presentada en numerosos medios de comunicación como "unha empresa vangardista, que lles dá traballo á xente nos países nos que hai problemas".